“Nos A Traha Nos Teritorio Hopi Bes!”
1 Bo a yega di sinti cu ta traha boso teritorio asina tantu biaha cu no tin mas hende semehante di carné den dje? Podisé bo a pensa: ‘Mi sa con e hendenan lo reaccioná. Pakico sigui bai bek cerca esnan cu no ta interesá?’ Ta berdad cu hopi teritorio ta ser trahá cu frecuencia. Sin embargo, mester mira esaki como algu positivo i no negativo. Di con? Tuma nota di cuater motibu cu ta ser duná aki bou.
2 Nos Oracionnan A Ser Contestá: Jesus a bisa: “E cosecha, en berdad, ta grandi, pero e trahadónan ta poco. P’esei roga n’e Doño dje cosecha pa manda trahadó na su cosecha.” (Luc. 10:2) Pa décadanan nos a suplicá Jehova pa manda mas yudansa. Awor nos tin den hopi lugá e trahadónan necesario, i nos ta cubri e teritorio cu mas frecuencia. E echo cu Jehova a contestá nos oracionnan no mester haci nos contentu?
3 Persistencia Ta Duna Bon Fruta: Asta den teritorionan hopi trahá, hende ta reaccioná faborabel riba e mensahe di Reino i ta yega na un conocimentu dje berdad. P’esei, nos mester sigui yama bes tras bes cu speransa di haña mas hende di curason onrado. (Isa. 6:8-11) Mescos cu Jesus su promé disipelnan a haci, “bai continuamente” na e hendenan den bo teritorio asigná, i purba stimulá nan interes den e Reino di Dios.—Mat. 10:6, 7.
4 Na Portugal, hopi congregacion ta cubri nan teritorio tur siman, pero tog nan ta haña hende semehante di carné. Un ruman muher en particular tin un actitud masha positivo. E ta bisa: “Tur mainta promé cu mi sali pa sirbishi, mi ta resa pidi Jehova yuda mi haña un hende interesá den studia Bijbel.” Un dia el a haci areglo pa studia cu e empleadonan di un pelukeria. Pero despues ta un persona so a presentá p’e studio. E persona ei a bisa: “E otronan no ta interesá, pero ami sí.” Denter di un luna e persona ei mes tabata conducí dos studio di Bijbel. No a tarda hopi cu el a bautisá i despues a drenta den e sirbishi di pionero!
5 E Trabou Ta Ser Efectuá: E bon nobo di reino ta ser predicá, manera Jesus a profetisá cu lo sosodé. (Mat. 24:14) Asta caminda hende “no kier scucha [nos],” nos ta avisá nan mediante e actividad di predicá. Nos ta verwagt cu algun lo no ta receptivo of ta asta oponé e berdad. Sin embargo, mester spierta e hendenan ei debidamente dje binidero huicio di Jehova.—Eze. 2:4, 5; 3:7, 8, 19.
6 Nos No Ta Cla Ainda: No ta keda na nos pa dicidí ki ora mester stop di predicá. Jehova sa precis ki ora esei mester stop. E sa si tin hende den nos teritorio cu kisas ainda mester reaccioná riba e bon nobo. Awe, tin hende ta bisa cu nan no ta interesá, pero cambionan drástico den nan bida—perdementu di trabou, malesa grave, morto di un ser kerí—por haci nan mas receptivo na un otro ocasion. Hopi hende, nunca no a ègt tende kico nos ta predicá, debí na prehuicio of djis pasobra nan ta muchu druk pa scucha. Bishitanan regular i amigabel por pone nan tuma nota i scucha.
7 Esnan cu a crece bira adulto den añanan recien i cu awor tin nan mes famia, ta tumando bida mas na serio i ta haciendo preguntanan cu ta e Palabra di Dios so por contestá. Un mama hóben a invitá dos Testigo den su cas i a bisa: “Como mucha, nunca mi no por a comprendé di con mi mama no kier a scucha Testigonan i tabata bisa nan cu e no ta interesá, ora cu único cos cu nan kier a haci tabata papia tocante Bijbel. Mi a dicidí den mi mes cu ora mi bira grandi, i casa i tin mi mes cas, lo mi pidi Testigonan di Jehova pa drenta i splica mi e Bijbel.” E Testigonan cu a yama na su cas a keda contentu cu esei ta net loke el a haci.
8 Bo Por Ta Mas Eficas? No ta semper ta e hendenan cu nos ta yama na nan cas ta esnan cu aparentemente ta hacié duru pa traha e teritorio cu frecuencia. Tin biaha ta nos mes. Nos ta bai den sirbishi cu pensamentunan negativo? Esei por afectá nos actitud i probablemente nos tono di bos i expresion di cara. Desplegá un actitud positivo i cara agradabel. Purba un introduccion nobo. Varia bo presentacion, i haci esfuerso pa mehor’é. Podisé bo por cambia bo pregunta di introduccion of hinca un otro texto bíblico den bo combersacion. Puntra otro rumannan kico nan a ripará ta duna éxito ora di traha e teritorio. Traha den sirbishi cu diferente publicadó i pionero, i tuma nota di kico ta haci nan ministerio eficas.
9 E trabou di predicá e Reino tin Jehova su aprobacion i bendicion, i participando den dje nos ta duna prueba di nos amor p’e i pa nos próhimo. (Mat. 22:37-39) Pues laga nos efectuá nos trabou te ora e ta cla, sin cansa di traha e teritorio bes tras bes.