Planea di Antemano—Pa Haci Kico?
1 Nos tur sa pensa riba nos plannan pa futuro. Esnan cu speransa terenal ta anticipá bida eterno den Dios su hustu mundu nobo. Pero tin influencianan cu lo por ranca e speransa ei for di nos curason. Nos mester haci esfuerso sincero pa sigui edificá nos bida rond di interesnan di Reino i no ser desviá dor dje deseonan tentador di carni.—1 Juan 2:15-17.
2 Mundu gewoon no por comprendé e metanan di hende spiritual. (1 Cor. 2:14) Miéntras cu otro hende ta lucha pa alcansá fama, poder of rikesa, nos ta sigui tras di tesoronan spiritual. (Mat. 6:19-21) Si nos mester purba adaptá nos manera di pensa conforme cu mundu su punto di bista di futuro, nos lo alcansá nos metanan spiritual un dia? Lo no tarda hopi cu cosnan mundano lo absorbá nos curason. Con nos por prevení esaki?
3 “Bisti e Señor Jesucristo”: Un manera pa wak si nos ta edificando nos futuro rond di interesnan di Reino ta dor di examiná nos combersacion. Nos ta papia constant tocante cosnan material i interesnan mundano? Si ta asina, nos tin cu wak si nos curason no ta perdiendo su enfoke riba balornan spiritual. Podisé nos tin cu duna mas énfasis na ‘bisti e Señor Jesucristo, na lugá di planea di antemano pa deseonan di carni.’—Rom. 13:14.
4 Hóbennan por ‘bisti Cristo’ dor di planea di antemano pa e dia cu nan lo drenta den e ministerio di tempu completo. Un hóben cu kier a traha pionero regular a lanta den un cultura caminda e custumber predominante ta pa mucha homber bira financieramente bon pará. Pues, el a hinca su mes profundamente den negoshi te n’e grado cu e tabata bai reunion i sali den e ministerio mecánicamente. Pero una bes cu el a cuminsá confia den e palabranan di Jesus hañá na Mateo 6:33 i a kita for dje rutina monótono cu e tabata aden, el a start un carera den e sirbishi di tempu completo. Awor, cu un concenshi trankil e ta sirbiendo Jehova, manera e mes ta bisa: ‘Na su pleno potencial.’
5 Bijbel ta bisa cu ta sabí pa planea pa futuro. (Pro. 21:5) Laga nos tur haci esei teniendo e boluntad di Dios na promé lugá den nos mente.—Efe. 5:15-17.