E Goso di Sirbishi di Tempu Kompleto
1 Komo un persona hóben, sin duda bo a pensa riba bo futuro. Proverbionan 21:5 ta bisa nos ku “e plannan di hende balente siguramente ta kondusí na abundansia.” Pues lo ta bon pa bo mes pa pensa seriamente riba bo metanan den bida. Segun ku bo ta planea pa futuro, pensa riba e posibilidatnan pa drenta den e sirbishi di tempu kompleto. Dikon?
2 Puntra kualkier hende grandi ku a traha pionero tempu e tabata mas yòn, kiko e ta opiná di esei. Tur lo bisa bo meskos: “Eseinan tabata e mihó añanan di mi bida!” Un ruman hòmber ku a disfrutá di e goso di sirbishi di tempu kompleto for di su hubentut, a bisa mas despues den su bida: “Bo ta sinti un gran satisfakshon ora bo por wak bèk i pensa riba e tempu ku bo tabata yòn i por bisa ku bo a obedesé e konseho sabí: ‘Kòrda tambe riba bo Kreador den e dianan di bo hubentut.’” (Ekl. 12:1) Pero mester tin bon planeamentu for di awor, tantu di bo parti komo di parti di bo mayornan, pa bo haña e chèns di eksperensiá e klase di goso aki den bo hubentut.
3 Mayornan, Animá Sirbishi di Tempu Kompleto: Yehova, komo un Tata amoroso, ta mustra boso presis kua kaminda boso mester sigui. (Isa. 30:21) Dor di perkurá tal guia amoroso, e ta pone un bon ehèmpel pa boso komo mayornan kristian. En bes di laga boso yunan disidí kua ta e mihó kaminda pa nan, lo ta sabí si boso entrená nan den e kaminda ku nan mester sigui pa nan haña Yehova su bendishon. Despues, ora nan bira mas grandi, boso entrenamentu lo yuda nan “diserní loke ta bon i loke ta malu.” (Heb. 5:14) Hende grandi sa di eksperensia ku nan no por bai siegamente tras di loke nan ta kere ta bon; nan tin ku dependé riba Yehova p’e hasi nan kamindanan stret. (Pro. 3:5, 6) Esaki ta asta mas nesesario pa hóbennan, ya ku nan tin ménos eksperensia den bida.
4 Mayornan, segun ku boso yunan ta yega edat di tiner—òf asta mas promé—papia ku nan den un manera realístiko tokante ki karera lo ta bon pa sigui. Konseheronan eskolar, maestronan i muchanan den nan klas lo purba influensiá nan pa pone metanan mundano i materialista. Yuda bo yunan skohe un ‘opleiding’ ku ta duna entrenamentu práktiko, i ku ta prepará nan pa por perkurá pa nan nesesidatnan material sin tin nodi sakrifiká interesnan di Reino. (1 Tim. 6:6-11) Den hopi kaso, un edukashon di skol sekundario huntu ku un kurso pa preparashon profeshonal i/òf un ‘praktijkopleiding’ ta tur loke un persona mester pa por perkurá adekuadamente pa su nesesidatnan miéntras e ta kuminsá traha den e sirbishi di pionero regular.
5 Animá hóbennan pa kultivá e don di solteria. Si nan disidí di kasa despues, nan lo ta mihó prepará pa asumí e responsabilidatnan mas pisá di matrimonio. (Wak paragraf 19 di e suplemento di Nos Ministerio di Reino di yüni 2001, “Bo Por Hasi Bo Mes Disponibel?”) Inkulká den hóbennan, asta for di un edat hopi yòn, e deseo pa usa nan bida den un manera ku ta agradá Yehova, i ku ta benefisiá otro hende i duna nan mes tambe goso. Bo ta logra esei dor di papia di un manera positivo tokante e trabou di pionero, sirbi kaminda tin mas nesesidat, sirbishi di Bètel i aktividat di misionero.
6 Hóbennan, Pone Sirbishi di Tempu Kompleto na Promé Lugá: Hóbennan, boso no tin nodi keda ku gana di sa kon e trabou di pionero ta. Boso por purb’é dor di traha pionero ousiliar ki ora ku ta posibel durante e aña eskolar i durante periodonan di fakansi. E ora ei boso lo mira pa boso mes kuantu satisfakshon boso por haña for di e sirbishi di pionero! Boso lo por planea pa traha pionero ousiliar entre awor i fin di ougùstùs?
7 Si bo ta un yònkuman den Dios su organisashon, pensa tambe seriamente riba ki esfuersonan bo por hasi pa kualifiká komo sirbidó ministerial. (1 Tim. 3:8-10, 12) Ademas, disidí si lo bo kier apliká pa sirbishi di Bètel òf asistí na e Skol di Entrenamentu Ministerial una bes bo yega e edat rekerí pa esei. E eksperensia ku bo ta gana den e sirbishi di pionero lo siña bo lèsnan balioso, manera por ehèmpel, kon pa programá bo kosnan i hasi nan, kon pa bo ta mihó organisá, kon pa sali bon ku otro hende i kon pa desaroyá un sentido di responsabilidat. Tur esaki lo prepará bo pa privilegionan di sirbishi mas grandi despues.
8 Un faktor importante pa bo por tin éksito den sirbishi di tempu kompleto ta di tin un aktitut diligente den asuntunan relashoná ku Dios su sirbishi. Apòstel Pablo a promové un aktitut asina, i el a indiká den ki benefisio esei lo resultá: “Tur loke boso hasi, hasi boso trabou di kurason, komo pa SEÑOR . . . sabiendo ku for di Señor boso lo risibí e rekompensa.” (Kol. 3:23, 24) Yehova bendishoná boso ku hopi goso den e sirbishi di tempu kompleto!