Planea di Antemano!
1 Jehova su organisacion ta percurá un programa regular di actividadnan teocrático diseñá pa satisfacé tur nos necesidadnan spiritual. Aprecio ta impulsá nos pa saca pleno probecho di tur actividad organisá, manera bishita di superintendente di circuito, asamblea i congresonan i otro actividadnan special planeá localmente. (Mat. 5:3) Sin embargo, tin ruman ta perde e beneficio di hopi dje percuracionnan spiritual aki dor cu nan ta haci otro compromisonan. Kico nos por haci pa prevení esaki? Con nos por haci sigur cu actividadnan no-teocrático no ta bini na lugá di “e cosnan mas importante”?—Fil. 1:10.
2 Planeamentu Sabí Ta Esencial: Proverbionan 21:5 ta amonestá: “E plannan di esun diligente ta resultá sigur den bentaha, pero ken cu ta purá, ta riba caminda sigur pa haña su mes den necesidad.” Pa haña e “bentaha” spiritual, nos mester ta diligente den planea nos asuntunan di antemano, i tene cuenta cu areglonan cu a haci pa actividadnan teocrático. Nos mester programá nos actividadnan personal riba dianan cu lo no stroba nos pa ta presente pa cosechá bendicionnan spiritual. Si nos core traha plan pa haci loke personalmente nos tin gana di haci, sin pensa riba binidero eventonan teocrático, ta probabel cu nos lo sufri di “necesidad” spiritual.
3 No Perde Nan Beneficio! Nos tur ta traha plan pa futuro, entre otro pa vakansi, biahe di negoshi, pa bishitá famia, etcétera. Promé cu bo comprometé bo mes of traha afsprak definitivo, consultá e programa di binidero actividadnan spiritual. Si bo ripará cu e bishita di superintendente di circuito of cu un asamblea ta programá riba e mésun fecha cu lo bo ta afó, haci un esfuerso sincero pa cambia bo asuntunan di tal manera cu bo por participá. Nos ta haña sa hopi tempu di antemano di eventonan grandi programá pa futuro. E ancianonan di bo congregacion por bisa bo kico tin planeá localmente.
4 Dor di pensa adelantá i planea di antemano pa e cosnan mas importante, nos lo ta “yená cu fruta hustu, . . . p’e gloria i alabansa di Dios.”—Fil. 1:11.