E Ta Stroba Bo di Predicá?
1 Mayoria hende tin un bida druk. Testigonan di Jehova ta entre esnan mas druk: nan ta studia e Palabra di Dios, asistí na reunionnan di congregacion i participá den sirbishi di veld. Ademas, nos ta druk cu trabou seglar, trabou di cas of huiswerk i hopi responsabilidad mas, i nan tur ta tuma tempu. Foral pa cabesnan di famia esaki ta un reto.
2 Debí na situacion económico malu den vários pais, cabesnan di cas kisas tin cu traha hopi i duru pa gana nan pan. Ora cu trabou seglar exigente ta tuma gran parti di nan tempu i energia, nan ta sobra masha tiki pa e trabou di predicá. Siendo cu cabesnan di cas tin e obligacion di percurá materialmente pa nan famia, tin algun ta sinti cu nan por participá masha poco den e ministerio. (1 Tim. 5:8) Ta cierto cu obtené e necesidadnan di famia awe ta trece hopi preshon cuné. Pero un persona su trabou seglar no tin nodi strob’é di predicá e bon nobo. (Mar. 13:10) Pues, nos ta haci bon di examiná nos situacion actual.
3 Como cu e esena di mundu ta cambia constant, un cabes di famia por ta incliná na dedicá demasiado tempu na trabou, cu e meta di traha un reserva financiero pa crísisnan imprevisto. (1 Cor. 7:31) Aunke por parce cu mas tempu na trabou seglar ta percurá mas cos material of mas oportunidad pa recreo i entretenimentu, esaki lo haci e famia mas felis i mas satisfecho, si hacié a costo di tempu cu lo nan a dedicá na actividadnan spiritual i na asistencia regular na reunion? Nos sigur lo kier evitá cualkier cos cu lo pone nos spiritualidad na peliger. E proceder sabí ta pa haci caso di Jesus su conseho pa ‘acumulá tesoro den shelu’ i ser “ricu pa cu Dios.”—Mat. 6:19-21; Luc. 12:15-21.
4 Busca Promé e Interesnan di Reino: Jesus a siña su siguidónan pa pone asuntunan spiritual promé cu tur otro cos. El a urgi nan: “Nunca no sea anshá i bisa: ‘Kico nos lo come?’ of: ‘Kico nos lo bebe?’ of: ‘Kico nos lo bisti?’ ” Di con el a bisa esei? El a splica: “Pasobra boso Tata celestial sa cu boso tin mester di tur e cosnan aki.” Si nos ta realmente convencí di esei, lo no tin nada cu lo stroba nos di haci loke Jesus a sigui bisa: “Sigui busca, anto, promé e reino i Su husticia, i tur e [cosnan material necesario] aki lo ser agregá na boso.” Dios lo soru p’esei sosodé! (Mat. 6:31-33) Awor sigur no ta tempu pa nos ser distraí dor di ansiedad innecesario relacioná cu gana nos pan of dor di un deseo pa haña un bida cómodo den un sistema di cosnan cu pronto lo pasa bai.—1 Ped. 5:7; 1 Juan 2:15-17.
5 E propósito principal di trabou seglar ta pa un persona percurá pa su necesidadnan material. Pero cuantu cos nos mester? Apostel Pablo a skirbi: “Teniendo cuminda, paña i dak, nos lo keda contentu cu esakinan.” Nos ta purba adkerí mas cu esei? Si ta asina, kisas nos ta cosechá e consecuencianan cu Pablo a spierta p’e: “Esnan cu ta determiná di bira ricu ta cai den tentacion i un trampa i hopi deseo insensato i perhudicial, cu ta tira hende den destruccion i ruina.” (1 Tim. 6:8, 9; Mat. 6:24; Luc. 14:33) Con nos por sa si deseo pa muchu cos ta strobando nos?
6 Si debí na nos actividadnan seglar nos ta participá masha poco den sirbishi di veld of nos no ta mira e necesidad di haci sacrificio pa causa dje bon nobo, anto ta necesario pa nos ahustá nos prioridadnan. (Heb. 13:15, 16) Un estilo di bida mas moderá lo contribuí hopi na eliminá e loke ta stroba nos di predicá. Ora ta trata di uso di nos tempu i energia, interesnan di Reino semper mester ta nos promé prioridad.
7 E Labor Cu No Ta en Bano: E palabranan di Pablo ta animá nos pa semper tin “hopi di haci den e trabou di Señor, sabiendo cu [nos] labor no ta en bano en relacion cu Señor.” (1 Cor. 15:58) E ‘trabou principal di Señor’ ta e predicacion di Reino i e trabou di haci disipel. (Mat. 24:14; 28:19, 20) Pa nos por tin un participacion mas pleno posibel, nos tin cu programá tempu pa sali den sirbishi di veld tur siman i haci esfuerso pa no usa e tempu ei pa ningun otro actividad. (Efe. 5:15-17) E ora ei ni trabou seglar ni niun otro cos lo stroba nos ministerio.
8 Ora nos ta dedicá nos mes na compartí berdadnan bíblico cu otro hende, nos ta experenciá e felicidad superior cu ta bini di duna. (Echo. 20:35) Dor di sigui tras dje trabou di predicá e Reino, nos por wak futuro cu confiansa, “pasobra Dios no ta inhustu p’e lubidá [nos] trabou i e amor cu [nos] a mustra pa su nomber.”—Heb. 6:10.