Bo Ta Demasiado Ocupá?
1 Pablo a urgi pa nos ‘semper tin hopi di haci den e trabou di Señor.’ (1 Cor. 15:58) Nos ta ser instá pa mantené un rutina diario pa studio personal, participá regularmente den e ministerio, asistí fielmente n’e reunionnan i percurá pa asignacionnan di congregacion diligentemente. Ademas di esei, nos mester yuda otronan cu tin mester di nos yudansa. Cu asina tantu pa haci, tin biaha nos por sinti nos aplastá, pensando cu nos tin cu busca maneranan pa reducí nos carga.
2 Tin situacionnan cu por hacié tantu sabí como razonabel pa eliminá cierto actividad of reducí nan cantidad. Algun persona ta sinti cu ta ser sperá di nan pa haci tur loke otro hende pidi nan. Un falta di balansa den esaki por producí presion i stres cu finalmente por bira devastador.
3 Sea Balansá: E clave pa balansa ta sinta den aplicá e conseho di Pablo pa “haci sigur dje cosnan di mas importante.” (Fil. 1:10) Esei simplemente kier men cu nos ta concentrá riba e cosnan cu realmente ta importá i, si tempu i circunstancianan ta permití, atendé na algun cos di ménos importancia. Obligacionnan di famia siguramente ta un dje cosnan cu ta vital. Nos tin cu trata cu cierto responsabilidad seglar. Sin embargo, Jesus a siña cu nos prioridadnan mester ser basá riba e principio cu nos ta busca promé e Reino. Promé nos mester haci e cosnan cu lo permití nos cumpli cu nos dedicacion na Jehova.—Mat. 5:3; 6:33.
4 Teniendo esaki na mente, nos lo haci sigur cu nos ta eliminá for di nos programa ocupá cualkier actividad personal innecesario, actividad di recreo excesivo i compromisonan no-esencial cu otronan. Ora di planea nos actividad pa cada siman, nos lo apartá tempu pa suficiente studio personal, un participacion razonabel den sirbishi, asistencia na reunionnan, i cualkier otro cos estrechamente asociá cu nos adoracion. E tempu cu resta por ser partí entre otro actividadnan, dependiendo di cuantu nan ta contribuí pa alcansá nos meta principal di ser cristiannan balansá cu ta mantené e Reino promé.
5 Haciendo lo anterior, tog ainda nos por sinti cu nos carga ta opresivo. Si ta asina, nos tin cu respondé n’e invitacion di Jesus: “Bini cerca mi, boso tur cu ta afaná i cargá, i lo mi refrescá boso.” (Mat. 11:28) Tambe, acudí na Jehova, “kende diariamente ta hiba nos carga” i ta duna na esun cansá poder. E ta primintí cu nunca lo e permití e hustu tambaleá. (Sal. 55:22; 68:19; Isa. 40:29) Nos por tin confiansa cu nos oracionnan lo ser contestá, haciend’e posibel pa nos perseverá den un bida activo di actividad teocrático.
6 Miéntras cu siguramente nos lo ser mantené ocupá siguiendo tras di interesnan di Reino cu ta bale la pena, nos por alegrá sabiendo cu nos labor no ta en bano en relacion cu Señor.—1 Cor. 15:58.