Bendicionnan Cu Aprecio pa e Amor di Jehova Ta Trece Cuné —Parti 1
1 Apostel Juan a skirbi: “En cuanto nos, nos ta stima, pasobra [Jehova] a stima nos promé.” (1 Juan 4:19) Ora nos pensa riba tur loke Jehova a percurá pa nos, nos ta ser motivá pa nos, na nos turno, demostrá nos profundo aprecio. Jesus a pone un ehempel den esaki dor di a obedecé su Tata dunando testimonio tocante e nomber i Reino di Dios. (Juan 14:31) Ta bon pa nos considerá algun manera cu nos por mustra nos aprecio p’e amor di Jehova i e bendicionnan cu esei ta trece cuné.
2 Bayendo di Cas pa Cas: Jesus a siña su disipelnan con pa haci e trabou di predicá e Reino. Su instruccionnan ta indicá bon cla cu nan a plama e bon nobo di cas pa cas. (Luc. 9:1-6; 10:1-7) Ta amor pa Dios i pa próhimo ta motivá nos pa sigui bai di cas pa cas aunke nos ta topa cu indiferencia i oposicion. Sin embargo, dor di bai di cas pa cas, nos ta beneficiá personalmente: nos fe ta bira mas firme, nos conviccion mas fuerte i nos speransa mas briyante.
3 Trahando bou di guia dje angelnan, nos a haña hopi hende cu tabatin hamber i sed pa e berdad. (Rev. 14:6) Tin doño di cas cu a bisa cu net nan tabata resa pidi yudansa ora cu un Testigo a yega na nan porta. Dos Testigo compañá pa un mucha chikitu tabata bai di cas pa cas na un isla di Caribe. Ora e dos adultonan a dicidí cu nan ta stop di predicá p’e dia ei, e mucha a cana bai su so n’e siguiente cas i a bati na porta. Un señora hóben a habri porta. Ora e adultonan a mira esaki, nan a bai cerca e señora i a papia cuné. El a invitá nan drenta i a splica cu net e tabata resa pidi Dios manda e Testigonan pa nan siñ’é Bijbel!
4 Predicando Riba Caya: Ya cu den algun área ta masha difícil pa haña hende na cas, un manera eficas pa duna hende testimonio ta di predicá riba caya. Ademas, tin hopi hende ta biba den bario rondoná pa muraya cu portier of cu entrada cerá of den edificionan di alta siguridad, caminda nos no por bai di porta pa porta. Sin embargo, nos aprecio pa e amor di Jehova ta motivá nos pa probechá di tur medio posibel pa pone hende den contacto cu e mensahe di Reino, incluso predicacion riba caya.—Pro. 1:20, 21.
5 Haciendo Rebishita: Ya cu nos ta buscando hende cu ta “conciente di nan necesidad spiritual,” nos kier haci loke nos por pa satisfacé e necesidad ei. (Mat. 5:3) Pues nos mester bolbe bek pa muha e simianan dje berdad cu nos a planta. (1 Cor. 3:6-8) Un ruman muher na Australia a laga un tratado cerca un señora cu no a parce di tin masha interes. Pero tog e ruman a sigui purba pa haña e señora atrobe na cas. Ora cu por fin el a haña contacto cuné, nos ruman a haña sa cu despues dje promé bishita e señora a bai cumpra un Bijbel caru. Anto e ruman a cuminsá studia cuné!
6 Conduciendo Studionan di Bijbel: Esaki por ta un dje rasgonan mas dushi i recompensador di nos ministerio. Ta un bendicion pa yuda hende siña tocante Jehova, anto mira nan haci cambio den nan bida pa agrad’é i despues ser testigo di nan bautismo cristian como símbolo di nan dedicacion na Dios!—1 Tes. 2:20; 3 Juan 4.
7 Den e siguiente edicion nos lo considerá mas manera cu nos ta ser bendicioná dor cu nos ta mustra aprecio pa e amor di Jehova.