Bendicionnan Cu Aprecio pa e Amor di Jehova Ta Trece Cuné —Parti 2
1 Luna pasá den e parti riba e tema aki, nos a destacá cuater manera cu den e ministerio nos por demostrá nos aprecio pa e amor di Jehova. (1 Juan 4:9-11) Den e artículo aki nos ta agregá cincu manera mas cu nos por demostrá esaki. Nos ta ser bendicioná ora nos participá plenamente den yuda otro hende spiritualmente.
2 Testimonio Informal: Esaki ta un manera eficas pa haña hende cu tin hamber i sed di husticia i tambe pa laga literatura práctico cu nan. Ta bon pa nos ‘cumpra e tempu oportuno’ i duna testimonio na tur ocasion i na ken cu nos topa. (Efe. 5:16) Podisé nos tin cu tuma un curashi pa haci esei, pero si nos ta apreciá e amor di Dios i ta comprendé e necesidad cu hende tin, nos lo duna testimonio na tur oportunidad.—2 Tim. 1:7, 8.
3 Un misionero a ser bendicioná ricamente pasobra el a cuminsá un combersacion cu un otro pasahero den un taxi. E homber a mustra interes. E misionero a rebishit’é i a cuminsá un studio bíblico cuné. E homber aki a bini den e berdad i a progresá te el a bira un anciano di congregacion!
4 Skirbi Carta: Kisas nos no por bai di cas pa cas debí na un of otro debilidad físico of debí na mal weer. Nos lo por skirbi carta, i asina duna un testimonio corticu via post na personanan cu nos conocé, na hende cu a perde un ser kerí of na esnan cu nos no a haña na cas den e teritorio. Nos por incluí un di nos tratadonan oportuno cu tin un mensahe bíblico atractivo, i animá e persona pa contestá si e tin cualkier pregunta. Usa bo adres personal of esun di Salon di Reino; por fabor no usa adres dje oficina di sucursal.
5 Testimonio via Telefon: Esaki ta un excelente manera pa alcansá hende cu nos no por topa den e trabou di cas pa cas. Si nos hacié na un forma discreto, amabel, cu tacto i abilidad, nos por haña hopi bon acohida. Nos Ministerio di Reino di februari 2001, página 5-6, ta duna sugerencia práctico en cuanto con pa haña mihó resultado.
6 Un ruman muher cu tabata predicá via telefon, a puntra un señora si el a yega di pensa kico tin den futuro p’e i pa su famia. E señora a bisa cu el a yega di pens’é i cu ta debí na su desesperacion, e tabata biba cerá den cas. Conmoví p’e interes sincero dje ruman, e señora a bai eens pa top’é na un plasa den becindario. Como resultado, e señora gustosamente a aceptá un studio bíblico!
7 Ricibí Hende Desconocí: Si nos ta stima nos próhimo, nos lo ta pendiente pa tuma nota di hende desconocí cu ta bishitá nos reunionnan i laga nan sinti nan bon biní. (Rom. 15:7) Laga e persona mira cu e ta entre hende cu ta sinceramente interesá den su bienestar spiritual. Si nos demostrá interes sincero i ofrec’é un studio di Bijbel personal, esei por motiv’é pa aceptá nos yudansa.
8 Nos Bon Conducta: Mediante nos bon conducta, nos ta dorna e berdad. (Tito 2:10) Ora hende den e mundu papia bon di nos como Testigo di Jehova, nan ta onra nos Dios. (1 Ped. 2:12) Esaki tambe por yuda otronan cuminsá cana den e caminda cu ta hiba na bida.
9 Pakico no repasá e cincu maneranan aki di demostrá nos aprecio pa Jehova su gran amor pa nos, i pone nan na práctica? (1 Juan 4:16) Segun cu bo ta haci esei, lo bo cosechá hopi bendicion.