“Hasi Bon na Tur Hende”
1 “Kumpli Debidamente ku e Predikamentu di e Palabra di Dios” i “Sea ‘Riku den Bon Obra’” tabata e temanan ku a ser tratá den e suplementonan di Nos Ministerio di Reino di febrüari i mart 2002. (Kol. 1:25; 1 Tim. 6:18) Den e suplementonan ei nos a risibí animashon pa hasi èkstra esfuerso pa yuda hende interesá asistí na Memorial, pa yuda esnan inaktivo bolbe partisipá den e kongregashon i pa yuda nos yunan i studiantenan di Beibel ku ta kualifiká pa nan bira publikadó dje bon nobo. Sin duda nos esfuersonan diligente a duna bon resultado. Awor, “miéntras nos tin oportunidat, laga nos [sigui] hasi bon na tur hende.”—Gal. 6:10.
2 Invitá Nan pa Asistí Atrobe: Den e teritorio di islanan ABC, mas ku 4.000 persona ku no ta publikadó di e bon nobo ta asistí na Memorial tur aña. Komo ku nan presensia ta indiká un grado di interes, kiko nos tin ku hasi pa stimulá esnan ku ta “korektamente dispuesto pa bida eterno” pa nan bira “kreyente”? (Echo. 13:48, NW) Animá nan pa asistí atrobe na e reunionnan di kongregashon mas pronto posibel.
3 Pakiko no invitá un persona interesá pa asistí na e Studio di Buki di Kongregashon p’e disfrutá di un interesante konsiderashon di e profesia di Isaías? Si bo ta un famia òf konosí di e persona i bo tin un parti den e programa di Skol di Ministerio Teokrátiko, lo bo por invit’é bin tende bo parti. Inform’é kua ta e temanan di e diskursonan públiko ku ta bai tin den e simannan binidero. (Riba e bòrchi di informashon mester pone un lista ku ta al dia.) Probechá di tur oportunidat pa lanta den e persona un deseo di adorá Yehova. I klaro ku si e no ta studiando Beibel ainda ku un ruman den kongregashon, bo por ofres’é un studio.
4 Sigui Animá Esnan Inaktivo: Vários persona ku ta asistí na Memorial a hasi un dedikashon na Yehova kaba. Sin embargo, na un dado momentu nan a stòp di prediká e bon nobo aktivamente. No opstante, Pablo a urgi nos pa “hasi bon . . . spesialmente na esnan ku ta di e famia di fe.” (Gal. 6:10) P’esei esnan inaktivo mester ta nos preokupashon prinsipal.
5 Kisas algun di nan ya a reakshoná bon riba e animashon di e ansianonan i di otro rumannan pa partisipá atrobe den sirbishi. Si e ansianonan a asigná bo pa traha ku un publikadó reaktivá, kòrda ku bo propio amor pa Yehova i pa sirbishi di fèlt lo duna e persona ei mas konfiansa. Mustr’é kon bo ta partisipá den vários rasgo di sirbishi pa e por haña goso den esei, pa e por persistí den e trabou di prediká i eksperensiá Yehova su bendishon.
6 Yuda Publikadónan Nobo Sali Riba un Bon Pia: Ora un señora resien interesá a realisá ku el a haña Dios su organisashon berdadero, e kier a sali den sirbishi mesora. Ora a bis’é kiko ta e kosnan ku e mester kumpli kuné, e di: “Laga nos dal bai mesora.” Si un persona ku bo ta studiando Beibel kuné a haña aprobashon awor pa kuminsá partisipá den sirbishi di fèlt, yud’é mira ku ta bon p’e “dal bai mesora.” Di e manera ei bo ta yuda e publikadó nobo kuminsá riba un bon pia. Yud’é desaroyá e kustumber di prepará pa sirbishi di fèlt i partisipá regularmente tur siman den dje.
7 Si ta bo yu a kaba di bira un publikadó ku no ta batisá, traha kuné pa e hasi progreso segun su edat i abilidat. Kisas lo bo keda sorprendí kon bon e por kòmbersá ku un persona, lesa for di Beibel i ofresé literatura ku djis un poko yudansa di bo parti. Ora e topa un persona ku a skucha bon den sirbishi di fèlt, train e pa hasi rebishita i sigui kultivá e interes.
8 Oumentá Bo Propio Sirbishi: Bo sirkunstansianan ta pèrmití bo oumentá bo partisipashon den e trabou di evangelisá asta despues di e temporada di Memorial? Lo bo por agregá tur siman un òf dos ora mas na e tempu ku bo sa pasa normalmente den sirbishi? Bo ta wak riba kalènder ki dia lo bo por bolbe traha pionero ousiliar? Òf bo por ahustá bo estilo di bida pa drenta den e sirbishi di tempu kompleto? Tur e esfuerso ku nos ta hinka den sirbishi lo por yuda un persona aseptá e bèrdat! (Echo. 8:26-39) Miéntras nos ta wak padilanti, laga nos “semper buska loke ta bon pa otro i pa tur hende.”—1 Tes. 5:15.
[Box on page 3]
Sigui Yuda:
□✔ Esnan ku a bin Memorial
□✔ Publikadónan reaktivá
□✔ Publikadónan nobo ku no ta batisá