Un Interkambio Spesial di Estímulo
1 Tur dia fe di e pueblo di Yehova ta ser poné na prueba. E echo ku Diabel sa ku a ked’é solamente un poko tempu, ta pon’é hasi un último intento pa kibra nos fieldat na Yehova. (Rev. 12:12) P’esei ta sumamente importante pa nos “sea fuerte den Señor, i den e forsa di su poder,” di manera ku nos por “resistí den e dia malu, i despues [ku nos] a hasi tur kos, para firme.”—Efe. 6:10, 13.
2 Asistí na reunion huntu ku kompañeronan di kreensia ta un areglo di Yehova pa yuda nos haña fortalesa. Apòstel Pablo a komprendé kon importante esaki ta. El a anhelá di por ta den kompania di su rumannan kristian ya asina nan por a “wòrdu enkurashá huntu” i “keda establesí,” es desir hasí firme. (Rom. 1:11, 12) Pa fortifiká nos pa hasi e boluntat di Dios, e Kuerpo Gobernante ku amor a hasi areglo pa duna nos e oportunidat di benefisiá di un interkambio di estímulo na e binidero Kongreso di Distrito “Proklamadónan Seloso dje Reino.”
3 Asistí pa Bo Benefisiá: Pone komo bo meta pa ta presente tur e tres dianan. Nos ta benefisiá mashá si nos yega promé ku e kantika di introdukshon i keda te ku nos bisa “Amèn” di kurason na e orashon di konklushon. (Isa. 48:17, 18) Hopi ruman lo tin ku regla nan orario di trabou for di trempan ya asina nan lo tin tempu disponibel pa asistí tur tres dia. Ta sierto ku kisas no ta fásil pa bo doño di trabou duna bo liber, pero Yehova ta sigurá nos ku lo e yuda nos hasi su boluntat. (1 Huan 5:14, 15) Si nos no a hasié ainda, awor ta momentu pa nos hasi areglonan definitivo pa haña liber, i no djis spera ku kos lo bai di mes. Nos por tin sigur ku Yehova lo bendishoná nos esfuerso pa asistí tur tres dia.—Pro. 10:22.
4 Spera ku Anhelo Riba e Estímulo: Bo a yega di bisa despues di un kongreso di distrito: “Esaki tabata esun di mas mihó!” Kon bini lo bo a sinti asina? Pasobra komo hende imperfekto pokopoko nos por kansa, i nos ta sinti ku nos tin mester di estímulo spiritual. (Isa. 40:30) Un ruman muhé a splika: “E sistema di kosnan aki ta kansá mi, i e kongresonan ta yuda mi bolbe enfoká riba mi aktitut spiritual, i ta duna mi e push spiritual ku mi tin mester. Ta parse ku e estímulo ta yega nèt ora ku mi tin mas mester di dje.” Probablemente bo tambe a yega di sinti asina.
5 Nos ta haña e estímulo nesesario no solamente dor di e diskursonan i entrevistanan, sino tambe dor di otro rasgonan di nos kongreso ku ta enrikesé nos spiritualmente. Un ruman hòmber a komentá: “Loke mi ta gusta mas ta e manera bon kla i práktiko ku ta apliká prinsipionan bíbliko. Klaro ku e dramanan ta mustra nos di un manera masha práktiko kon nos por benefisiá di ehèmpelnan di pasado, sea bon òf mal ehèmpel. E publikashonnan nobo ta loke semper mi ta spera ku anhelo, i mi ta sigui gosa di nan hopi tempu despues ku mi a regresá kas.”
6 Kongresonan ta un perkurashon masha importante for di Yehova durante e “tempunan trabahoso” aki. (2 Tim. 3:1) Nan ta yuda nos obedesé e konseho inspirá: “Sea alerta, para firme den fe, aktua manera hòmber, sea fuerte.” (1 Kor. 16:13) P’esei laga nos ta desididu pa asistí na tur seshon i gosa di un tremendo interkambio di estímulo na nos Kongreso di Distrito “Proklamadónan Seloso dje Reino”!
[Box on page 3]
Planea pa Asistí Tur Tres Dia
■ Pidi liber di trabou.
Hasi areglo pa haña transpòrt pa bai kongreso.