Bo Ta Apreciá Cosnan Sagrado?
1 Ora puntra nos si nos ta apreciá cosnan sagrado, probablemente nos lo bisa sí mesora! Cua ta algun dje percuracionnan sagrado di Dios cu nos ta apreciá?
2 Esta balioso e relacion personal cu nos por tin cu nos Tata celestial ta pa nos! E ta sigurá nos cu si nos ‘hala cerca dje, lo e hala cerca nos.’ (Sant. 4:8) Sin e sacrificio di rescate di Jesucristo, niun hende lo por ricibí bida eterno. (Juan 3:16) Como muestra di nos gratitud sincero, nos ta expresá tur dia den oracion nos aprecio profundo pa e regalo precioso aki di Dios.
3 Tambe Dios su Palabra inspirá, Bijbel Santu, ta sagrado pa nos, mescos cu Jehova su organisacion terenal. Nos ta demostrá e debido aprecio pa e percuracionnan aki di Jehova ora nos ta biba na armonia cu principionan bíblico, ora nos ta fortalecé e lasonan di amor fraternal, ta tene nos mes cuidadosamente na ordu teocrático i ta cooperá cu esnan cu ta hiba delantera.—1 Ped. 1:22.
4 Mediante e esclabo fiel i discreto, nos ta ricibí un abundancia di alimento spiritual. Esei lo ta e caso e aña aki na e Congreso di Distrito “Hacidónan dje Palabra di Dios.” Ei nos lo ricibí instruccion vital i disfrutá dje compañerismo caluroso cu nos tin asina tantu mester di dje. Con nos por demostrá aprecio sincero pa e percuracion sagrado aki?
5 No Neglishá e Cas di Jehova: Nehemías a encurashá esnan cu a traha duru pa reedificá e murayanan di Jerusalem pa ‘no neglishá e cas di nan Dios.’ (Neh. 10:39) E “cas” di Jehova ta su areglo pa adoracion. Nos congresonan di distrito ta parti dje areglo ei. Pa no neglishá e areglo aki, nos mester t’ei presente i paga bon tinu, mustrando Jehova cu nos ta duna gran balor na su percuracionnan. (Heb. 10:24, 25) Ki plannan nos mester traha awor pa mustra cu nos ta apreciá e evento sagrado aki plenamente?
6 Asistí Tur Tres Dia: Cada un di nos mester haci areglo pa ta presente tur tres dia dje congreso. Bo ta planeá pa yega trempan cada dia i keda te cu e oracion final di diadomingo? Si ta asina, lo bo ricibí bendicionnan ricu. Podisé no ta semper fácil pa asistí na un congreso. Kisas lo bo tin cu tuma un posicion firme pa bo por ahustá bo empleo seglar. No ta tur biaha tin transporte cumbiniente. Pero no laga e factornan aki descurashá bo di asistí n’e congreso.
7 Considerá e Excelente Ehempel Aki: Aña pasá riba caminda pa bai un congreso di distrito, un grupo di ruman den un pais africano caminda tin disturbio civil, a topa cu un grupo militar. Nan a puntra e rumannan: “Ken boso ta i na unda boso ta bai?” Nan a contestá: “Nos ta Testigo di Jehova, i nos ta riba caminda pa asistí na e congreso di distrito.” Un dje soldánan a comentá: “Boso Testigonan di Jehova no tin miedu di nada. Bai numa, i boso lo por tene boso congreso sin problema. Pero, tene cuenta sí cu boso lo topa hopi soldá. Cana semper meimei di caminda! Si boso mira hopi hende huntu, sigui cana meimei di caminda!” E rumannan a haci esei i a yega nan congreso sano i salbo. Nan a ser recompensá pasobra nan a demostrá nan aprecio pa cosnan sagrado.
8 Mescos cu nos rumannan na Africa, nos tambe ta confrontá situacionnan difícil. Pero sin duda, nos por imitá nan fe i sea decididu pa asistí na tur sesion di nos congreso di distrito. Si tin mester di ahuste, acudí na Jehova pa guia, sabiendo cu lo e bendicioná nos esfuersonan pa asistí na henter e programa.
9 Cosechá e Bendicionnan: Nos ta anhelá pa e Palabra di Dios, dor cu nos sa cu mediante dje nos por crece na salbacion. (1 Ped. 2:2) Asistí n’e congreso di distrito i scucha e programa lo yuda nos cada un desaroyá fe mas fuerte den e Palabra ei i asina ser mihó ekipá pa resistí e atakenan di Satanas. Haciendo esei nos lo mustra Jehova i tur mirones cu nos ta apreciá cosnan sagrado plenamente i cu “nos no ta e clase cu ta hala atras . . . sino e clase cu tin fe cu ta conserbá e alma bibu.”—Heb. 10:39; 12:16; Pro. 27:11.
10 Nos por anticipá e momento cu Jehova Dios lo habri e portanan di shelu i basha riba nos yobidanan abundante di bendicion spiritual. (Mal. 3:10) Hacié bo meta pa ta presente na e Congreso di Distrito “Hacidónan dje Palabra di Dios” for di apertura dje programa diabierne mainta te na e oracion di conclusion i “Amen!” diadomingo atardi. Lo bo keda contentu di a hacié!