Congresonan—Tempu pa Alegrá!
1 E congresonan di Testigonan di Jehova ta ocasionnan di gran alegria. Pa mas cu shen aña, e reunionnan aki a contribuí na e aumento cu a bin ta tuma lugá den nos organisacion. For di un comienso chikitu, nos a mira Jehova su bendicion ricu riba nos obra mundial. Na aña 1893, na nos promé congreso den tempu moderno, na Chicago, Illinois, un total di 70 persona dje 360 presente a bautisá como símbolo di nan dedicacion na Jehova. E seri di congresonan di distrito di aña pasá, “Hacidónan dje Palabra di Dios,” tabatin un asistencia mundial combiná di 9.454.055 i 129.367 a bautisá. Esta un motibu maraviyoso pa alegrá!
2 For di den tempu bíblico, reunionnan dje pueblo di Dios tabata un medio principal pa duna instruccion for di Jehova. Den tempu di Ésdras cu Nehemías, e pueblo a scucha e lesamentu di Ley “for di ora cu mainta a habri te cu merdia.” (Neh. 8:2, 3) I dor cu n’e ocasion ei e pueblo a ricibí un mihó comprendimentu dje Ley, nan a sinti “un gran alegria.” (Neh. 8:8, 12) Nos tambe ta alegrá cu congresonan ta percurá un excelente oportunidad pa nos ricibí bon instruccion i alimento spiritual “n’e debido tempu” for di Jehova mediante su “esclabo fiel i discreto.” (Mat. 24:45) Congresonan ta vital pa nos bienestar spiritual ya cu Jesus a bisa cu hende tin cu biba “di tur expresion cu ta sali for dje boca di Jehova.”—Mat. 4:4.
3 Ta Bale la Pena Asistí: Nos tur mester pone como nos meta personal pa ta presente na henter e Congreso di Distrito “Siñadónan dje Palabra di Dios” dje aña akí. Nos mester planea pa yega tur dia trempan i pa keda te ora nos tur huntu bisa “Amen!” na e oracion di conclusion. Kisas nos lo tin cu ahustá nos programa pa logra esaki. Podisé ta un tiki problema pa nos haña dianan liber di trabou pa asistí n’e congreso. Nos tin cu tuma un posicion firme, i no laga nada keda na casualidad. Si nos tin mester di alohamentu i/of transport, nos tin cu haci areglo trempan. Sea cual sea e esfuerso cu nos tin cu haci, lo e ta bale la pena!
4 Jehova su pueblo no ta calculá e bendicionnan di asistí na un congreso den florin cu debchi. Considerá e ehempel di algun ruman cu tabata decididu pa asistí na e Asamblea Internacional Boluntad Divino di 1958 di Testigonan di Jehova na New York City. Un ruman homber a cera su negoshi di construccion pa dos siman p’e asistí i traha boluntario na asamblea. Un ruman homber na Islanan Vírgenes a bende dos hectar di tereno ya asina henter su famia di seis persona por a asistí. Un pareha hóben a bende nan boto di motor pa asina nan por a bai e asamblea cu tur nan tres yunan cu tabata entre dos luna te cu shete aña. Nan a bisa tres ruman homber carnal di California cu si nan no bin traha, ora nan regresá nan no tin trabou. Sin embargo, esei no a stroba nan di bai e asamblea inolvidabel ei.
5 Jehova Ta Recompensá Nos Esfuerso Sincero: Jehova ta mira i ta bendicioná e esfuerso di su pueblo. (Heb. 6:10) Un ehempel. Na e Asamblea Aumento di Teocracia di 1950, esnan presente a tende e discurso histórico “E Sistema Nobo di Cosnan.” Ruman Frederick Franz a lanta i stimulá e interes di tur hende dor di puntra: “E asamblea internacional aki lo no keda contentu di sa cu akinan, awenochi, meimei di nos, tin un cantidad di prospectivo prins dje tera nobo?” Mas cu 50 aña despues, ainda nos ta alegrá cu e comprendimentu clarificá aki di Salmo 45:16.
6 Despues di a asistí na e congreso di distrito di aña pasá, un cabes di famia apreciativo a skirbi lo siguiente: “Rumannan, nunca boso lo por imaginá con e congreso aki a salba bida. Mi famia a muda bini stad pa motibu di trabou, sin embargo nos spiritualidad a cai na awa. . . . Nos a neglishá nos obligacionnan cristian i asta nos a stop di bai reunion i sali den sirbishi. . . . E congreso aki a rehubenecé nos, i un biaha mas nos ta poniendo metanan spiritual i ta organisando nos mes pa logra esakinan.”
7 Jehova ta suministrá e alimento spiritual cu nos tin mester. Na nos congresonan e ta drecha un mesa yen di alimento. Nos aprecio pa e percuracion aki mester impulsá nos pa bisa mescos cu Cornelio a bisa ora apostel Pedro a bishit’é: “Na e tempu aki nos tur ta presente dilanti Dios pa tende tur loke Jehova a manda bo pa bisa.” (Echo. 10:33) Laga nos pone como nos meta pa ta “presente dilanti Dios” e aña akí na tur sesion dje Congreso di Distrito “Siñadónan dje Palabra di Dios” i alegrá!