Programa Nobo di Asamblea di Sirkuito
1 Pa nos por para firme den fe den un mundu instabil, nos tin ku konfia den Yehova. Kon nos por desplegá e konfiansa ei den nos bida di tur dia? Ki efekto konfiansa den Yehova tin riba nos bida personal i di famia? Kon e ta yuda nos resistí e influensia di e mundu di Satanas? E programa di asamblea di sirkuito pa e aña di sirbishi 2003 ta kontestá e preguntanan aki. Su tema ta “Konfia den Yehova i Hasi Loke Ta Bon.”—Sal. 37:3.
2 No ta na okashonnan spesial òf na momentunan di desesperashon so nos ta demostrá konfiansa den Yehova. Nos tin ku hasi esei den tur aspekto di nos bida diario. E promé diskurso, “Konfia Tur Ora den Yehova,” ta enfatisá esaki. (Sal. 62:8) E simposio di kuater parti “Kon pa Desplegá Konfiansa den Yehova” lo mustra nos kon pa haña i apliká informashon basá riba Beibel ku por yuda nos forma un matrimonio felis, trata ku problemanan ku ta surgi den famia i satisfasé nos nesesidatnan material.
3 E mundu di Satanas ta purba bruha nos punto di bista di loke ta bon i loke ta malu, i ta kousa konfushon relashoná ku kiko ta importante i kiko nò. (Isa. 5:20) E diskursonan “Vigilá Kontra e Banidatnan di Bida” i “Evitá Maldat—Sea Hasidónan di Loke Ta Bon” lo reforsá nos determinashon pa tene e normanan elevá di Yehova na haltu.—Ámos 5:14.
4 Ora Yehova trese un fin na e mundu malbado aki, sirbidónan di Dios lo tin ku konfia kompletamente den dje. E diskurso públiko titulá “Liberashon for di Angustia Mundial Ta Serka,” ta enfatisá esaki. Despues di esei nos lo haña e invitashon pa analisá nos mes den e parti “Lo Bo Ta Entre Esnan Digno di e Reino di Dios?” E programa ta konkluí ku un apelashon urgente: “Konfia den e Promesanan di Yehova.”
5 Un punto sobresaliente di tur asamblea ta e diskurso di boutismo. Ken ku kier batisá mester bisa e superintendente presidente mas pronto posibel di manera ku e por hasi e areglonan nesesario.
6 Den e tempu di insiguridat aki, Yehova ta e úniko fuente berdadero di konfiansa i stabilidat. (Sal. 118:8, 9) Laga nos tur fortifiká nos konfiansa den dje dor di ta presente pa henter e programa di asamblea di sirkuito.