Mustra Apresio pa Rekursonan Teokrátiko
1 Ora Rei Hosias tabata hasi areglo pa drecha e tèmpel, el a elogiá esnan nombrá pa hasi e trabou dor di bisa: “No mester pidi nan pa duna kuenta di e plaka entregá den nan man, pasobra nan ta hende onesto [“fiel,” NW].” (2 Rei. 22:3-7) E apresio ku e hòmbernan ei tabatin pa kos sagrado a keda bisto den e manera ku nan a usa e rekursonan konfiá na nan. Awe ku nos ta partisipá den e obra santu dje bon nobo di Dios, nos tambe tin ku mustra ku nos ta fiel ora di trata ku e rekursonan konfiá na nos.
2 Den Sirbishi di Vèlt: Dor ku nos ta konsiente ku e mensahe den nos publikashonnan ta vital, i ku ta kosta plaka pa produsí nan, nos ta balorá nan hopi. Nos no mester ofresé nos literatura pa loko na hende ku no ta mustra berdadero apresio pa e mensahe di Beibel. Si un hende no ta mustra muchu interes den e bon nobo, nos lo por ofres’é un tratado na lugá di otro tipo di literatura.
3 Ora bo ta parti literatura, hasié na un manera ku ta reflehá apresio pa su balor. Evitá di laga literatura na lugánan públiko kaminda lo e djis bula bai. Pa evitá di malgastá literatura, wak loke bo tin wardá na kas promé ku bo buska mas. Si bo ta sobra revista regularmente, pensa di redusí bo kuota.
4 Publikashonnan pa Uso Personal: Nos mester pidi solamente publikashonnan ku nos tin mester di bèrdat. Prinsipalmente ora ta trata di Beibel deluxe, Beibel ku Referensia i otro publikashonnan mas grandi manera Konkordansia, Indèks, volúmen di Perspikasia i e buki Proklamadónan, nos no mester bestèl pa loko. Nan ta kosta basta plaka pa produsí.
5 Bo ta sòru skirbi bo nòmber i bo adrès den bo ehemplarnan personal? Asina bo ta evitá ku nan ta pèrdè i bo mester buska otro. Si bo pèrdè un buki di kantika, un Beibel òf un buki di studio, kisas bo por hañ’é bèk den e ophetonan pèrdí i hañá na Salon di Reino òf na e sitio di asamblea.—Luk. 15:8, 9.
6 Laga nos hasi nos bèst pa usa nos literatura n’e manera mas sabí posibel. Esaki ta un manera pa mustra ku nos ta fiel ora di anda ku e rekursonan di Reino ku Yehova a konfia na nos.—Luk. 16:10.