Hasi Bon Uso di Nos Publikashonnan
1. Meskos ku Hesus, kon nos por mustra apresio pa Yehova su provishonnan?
1 Despues ku Hesus milagrosamente a alimentá un multitut grandi, el a sòru pa loke a sobra no bai pèrdí. (Mat. 14:19-21) E echo ku Hesus a mustra apresio pa Yehova su provishonnan ta sirbi komo un bon ehèmpel pa nos. Nos tambe por mustra nos ‘gratitut’ dor di hasi bon uso di tur loke Yehova a proveé mediante e ‘fiel mayordomo.’—Kol. 3:15; Luk. 12:42; Mat. 24:45-47.
2. Kon nos por evitá di akumulá revista?
2 Revistanan: Ta masha fásil pa nos revistanan akumulá. Si frekuentemente nos ta sobra revista, nos mester redusí nos kuota. Kiko di e revistanan mas bieu? Nan no ta pèrdè balor atraves di tempu. Si nos tin revista ku a akumulá, kisas e superintendente di sirbishi òf un otro ansiano por yuda nos haña un manera efektivo pa laga nan.
3, 4. Kiko nos mester tene kuenta kuné ora nos ta buska literatura na Salòn di Reino?
3 Otro Literatura: Ora e oferta di literatura kambia, wak na kas promé si ainda bo tin ehemplar di e publikashon ei, anto si bo no tin bo por buska na Salòn di Reino. Buska solamente loke bo tin mester pa e siman ei, i ora bo laga nan bo por buska mas.
4 Ora bo ta buska publikashonnan pa uso personal, pidi solamente loke bo tin mester. Skirbi bo nòmber den e publikashon. Ya si bo pèrdè bo ehemplar, bo por hañ’é bèk. Si bo ta usa e Watchtower Library riba CD-ROM i ta warda un ehemplar di e revistanan, kasi sigur lo bo no tin mester di hasi pedido di e volúmennan di La Atalaya i ¡Despertad!
5. Kiko nos mester kòrda ora nos ta laga nos publikashonnan?
5 Ora di Laga Publikashon: Nos ta trata na laga nos publikashonnan solamente serka hende ku mustra berdadero interes. Kòrda ku na promé lugá ta nos ta responsabel pa e gastu finansiero di e hèrmèntnan balioso akí ku nos ta laga den sirbishi. Ora nos laga un publikashon serka un hende interesá, no keda sin bisa nan ku nan por sostené e obra mundial mediante nan donashonnan.
6. Dikon nos ta balorá nos publikashonnan asina tantu, i esei ta motivá nos pa hasi kiko ku nan?
6 Hesus a hasi milager pa duna hende kuminda, pero su meta prinsipal tabata pa alimentá hende spiritualmente. Hesus a bisa: “Hende lo no biba di pan so, ma di tur palabra ku ta sali for di boka di Dios.” (Mat. 4:4) Nos publikashonnan ta siña hende bèrdatnan bíbliko ku ta sumamente importante pa nan por haña bida eterno. (Juan 17:3) Nan ta muchu balioso pa bai pèrdí!