No Kore Tras di “Banidat”
1 Awendia E-mail a bira un medio di komunikashon hopi usá, i hende ta hasi bon uso di dje pa kompartí eksperensia personal i pensamentu entre famia i amigunan. Pero, kua ta algun kos sin balor, òf “banidat” ku tin di haber ku uso pa loko di E-mail?—Pro. 12:11.
2 Kos pa Paga Tinu Kuné ku E-Mail: Algun ruman ta bisa ku nan ta sinti nan mes mas den kontakto ku Yehova su organisashon ora nan risibí loke den nan bista ta informashon fresku for di E-mail. Entre otro por ta trata di eksperensia, informashon tokante eventonan ku a tuma lugá na Bètel, informe di desaster òf persekushon i asta informashon konfidensial presentá na Skol di Ministerio di Reino. Ta parse ku algun ruman ta muchu ansioso pa manda e tipo di mensahenan ei, ku speransa di ta e promé pa revelá e informashon na nan amigunan.
3 Tabatin bes ku e informashon òf eksperensianan a ser trosé òf eksagerá. Por sosodé tambe ku dor ku un hende ta buska sensashon e ta duna un impreshon robes. Hopi bes esnan ku ta muchu purá pa revelá informashon no ta na altura di tur detaye. (Pro. 29:20) Den algun kaso, maske e kuenta ta zona inkreibel, esnan ku risibié ta sigui mand’é tòg pa otro hende djis komo un kos interesante. Informenan sin base ku por duna hende un impreshon robes ta loke nos por yama ‘fábula,’ i nan no ta promové berdadero deboshon na Dios.—1 Tim. 4:6, 7.
4 Si bo risibí un mensahe anto bo mand’é pa otro hende, i despues resultá ku e ta kontené informashon sin base, abo tambe por ta responsabel pa kualke tristesa òf konfushon ku e okashoná. Ora David a risibí un informe eksagerá ku a bisa ku nan a mata tur su yunan, el a “sker su paña” den su angustia. Pero a resultá ku ta un di su yunan so a muri. Esei mes tabata basta tristu kaba, pero e eksagerashon a pone David bira mas angustiá ainda. (2 Sam. 13:30-33) Ta sigur ku nos no kier hasi nada pa malinformá ni desanimá niun di nos rumannan.
5 E Medio Ku Dios a Apuntá: Tene na mente ku nos Tata selestial a apuntá un medio di komunikashon, “e esklabo fiel i prudente.” E “esklabo” ei ta responsabel pa determiná ki informashon e kas di fe ta risibí, i ki ora ta e “debido tempu.” E kuminda spiritual aki ta disponibel via e organisashon teokrátiko so. Semper nos mester akudí na e medio ku Dios a apuntá si nos kier haña informashon konfiabel, i no na un red di usadó di Internet.—Mat. 24:45.
6 Web Site Riba Internet: Nos tin un web site ofisial riba Internet: www.watchtower.org. E web site aki ta duna informashon amplio na públiko. No tin nodi pa niun hende, ni komité ni kongregashon traha web page tokante Testigunan di Yehova. Algun ruman a pone kontenido di nos publikashonnan riba Internet ku sita kompleto di tur e tekstonan sitá, i asta a ofresé material di kongreso riba base di donashon. Sea ku ta pa hasi ganashi òf nò, reprodukshon i distribushon di publikashonnan di Testigunan di Yehova den un dokumento elektróniko ta un violashon di derecho di outor. Maske nan ta mir’é komo un servisio na nan rumannan, echo ta ku esaki no ta un práktika aprobá, i mester stòp kuné.
7 Nos mester paga bon tinu i usa sano huisio ora nos ta hasi uso di komunikashon elektróniko, pa hasi sigur di yena nos mente ku “rikesa presioso i agradabel.”—Pro. 24:4.