Un Apelashon Sinsero pa Hasi Kaso di Ehèmpelnan Spièrtador pa Nos Dia

Nos tur por fortalesé nos determinashon pa keda fiel dor di hasi kaso di e lèsnan ku nos a siña for di e drama bíbliko presentá riba e vidio Ehèmpelnan Spièrtador pa Nos Dia. Pero promé ku bo wak e, lesa por fabor Numbernan kapítulo 25 i e informashon relashoná ku esaki den Perspikasia pa Komprendé e Skritura, Volúmen 2 (na spañó), página 408 §6 pa página 409 §1 (na ingles, página 419 §3-5). Despues kontestá e siguiente preguntanan: Ken e moabitanan tabata, i dikon Yehova a bisa Moises pa no bai guera kontra nan? (Deu. 2:9) Ki komplòt Balam a traha pa usa e moabitanan pa destruí e nashon di Israel? Dikon nos no mester lubidá ku hopi israelita a pèrdè nan bida durante un prueba krusial djis promé ku nan a drenta e Tera Primintí?—1 Kor. 10:11, 12.

Ora bo ta wak e vidio Ehèmpelnan Spièrtador, pensa riba e siguiente áreanan di bida ku nos mester presta atenshon serio na dje awendia si nos kier keda fiel i mantené Dios su aprobashon. (1) Aktitut: Kon algun israelita a mustra ku nan tabatin un aktitut robes pa ku Yehova i su areglonan? Mas bien, nos tin ku hasi esfuerso pa manifestá ki aktitut? (2) Asosiashon: Dikon Yehova no tabata kier pa e israelitanan sera amistat ku e moabitanan? (Éks. 34:12; Pro. 13:20) Dikon nos tin ku skohe nos amistatnan di un manera sabí? (3) Moralidat: Den kua piká serio mal asosiashon a hiba rònt di 23.000 israelita? (1 Kor. 10:8) Kiko a pone algun sirbidó di Yehova djawe kai den e trampa di inmoralidat? Pero kon nos por protehá nos mes? (4) Adorashon: Kua prueba a saka na kla si e israelitanan a adorá Dios na un manera puru? Bou di ki forma sutil di idolatria algun hende por sukumbí awe? Pero kon nos por evitá esei?—Kol. 3:5.

Kon e drama ta mustra ku Yamin a ser rekompensá p’e echo ku el a keda limpi moralmente? Ki apelashon sinsero e Kuerpo Gobernante ta hasi na tur kristian berdadero mediante e vidio aki? Si bo ta kabes di famia, dikon bo ta kere ku ta bon pa bo famia wak e vidio aki bes tras bes?