Yudansa na Ora

¹ Ora apòstel Pedro a mira e nesesidat pa fortalesé kompañeronan den fe, interes a motiv’é pa duna nan rekordatorio i animashon amoroso. (2 Ped. 1:​12, 13; 3:⁠1) El a konsehá “esnan ku a optené un fe” pa sigui krese den kualidatnan spiritual pa nan no bira ni ‘inútil [“inaktivo,” NW ] ni sin fruta den e konosementu berdadero di nos Señor Hesukristu.’ (2 Ped. 1:​1, 5-⁠8) Pedro su propósito tabata pa yuda nan hasi e yamamentu i skohementu ku nan a haña for di Yehova sigur, pa “e haña [nan] den pas, sin mancha i sin kulpa.” (2 Ped. 1:​10, 11; 3:⁠14) Pa hopi kompañero kreyente, su animashon a resultá di ta na ora.

² Awendia, superintendentenan kristian tin un interes similar pa Dios su pueblo. Durante e “tempunan trabahoso” aki, hopi sirbidó di Yehova ta lucha ku sirkunstansianan difísil. (2 Tim. 3:⁠1) Pa motibu di problemanan kontinuo, sea finansiero, di famia i personal, algun por sinti meskos ku David: “Masha hopi maldat mes a rondoná mi; mi inikidatnan [òf, “erornan,” NW ] a alkansá mi, asina ku mi no por a mira; nan ta mas hopi ku e kabeinan riba mi kabes; i mi kurason a faya mi.” (Sal. 40:⁠12) E preshonnan aki por bira asina grandi ku e personanan ei por kuminsá neglishá asuntunan spiritual vital i stòp di partisipá den e sirbishi kristian. Sin embargo, apesar di tur nan problemanan ‘nan no ta lubidá Yehova su mandamentunan.’ (Sal. 119:⁠176) Awor ta e tempu apropiá pa e ansianonan duna yudansa nesesario na rumannan asina!​—⁠Isa. 32:​1, 2.

³ Pa kumpli ku e nesesidat aki, e ansianonan a wòrdu animá pa hasi un esfuerso spesial pa yuda esnan ku aktualmente no ta partisipá den e trabou di prediká. Pa logra esaki tin un esfuerso grandi ta tumando lugá awor, i lo sigui kuné durante luna di mart. A pidi superintendentenan di studio di buki pa bishitá esnan inaktivo pa ofresé asistensia spiritual ku e meta di yuda nan reanudá nan aktividat den e kongregashon. Si ta nesesario, por hasi areglo pa un studio di Beibel personal. Nan por pidi otro publikadónan pa duna yudansa. Si nan pidi bo pa hasi esei, e esfuerso ku bo hasi lo por ta masha benefisioso, spesialmente si bo duna animashon na un manera bondadoso i komprensivo.

⁴ Tin bon motibu pa tur hende alegrá ora un kompañero kreyente bira aktivo bèk den e kongregashon. (Luk. 15:⁠6) Sí, nos esfuerso pa animá esnan inaktivo por resultá den “un palabra papiá na ora.”​—⁠Pro. 25:⁠11.