Predikando den un Mundu Ku Ta Kambia Konstant
1 Kosnan sa kambia lihé! Di un dia pa otro, un desaster natural, un krísis ekonómiko, un disturbio polítiko òf un tragedia ku a haña hopi publisidat, por bira e tema di kòmbersashon. Sin embargo, ta mes lihé hende por dirigí nan atenshon tambe na un otro kos. (Echo. 17:21; 1 Kor. 7:31) Den e mundu aki ku ta kambia konstant, kon nos lo por kapta hende su atenshon pa asina kompartí e mensahe di Reino ku nan?
2 Ripará Kiko Ta Preokupá Hende: Un manera pa kapta hende su atenshon ta dor di referí na susesonan di aktualidat. Na un okashon ora ku Hesus tabata animá su oyentenan pa pensa seriamente riba nan relashon ku Dios, el a menshoná tragedianan ku a kaba di tuma lugá i ku tabata okupá nan mente. (Luk. 13:1-5) Di mesun manera, ora nos ta presentá e bon nobo ta bon pa nos referí na un notisia òf asuntu lokal di aktualidat ku ta toka bida di e hendenan den nos teritorio. Sin embargo, ora nos ta papia di asuntunan asina nos tin ku tene kuidou pa nos no tuma parti ni pa esun ni pa e otro partido den asuntunan polítiko òf sosial.—Juan 17:16.
3 Kon nos por sa kiko e hendenan ta pensando aktualmente riba dje? Kisas e mihó manera pa sa ta dor di simplemente hasi un pregunta anto skucha kiko nan ta bisa. (Mat. 12:34) Nos interes den hende lo motivá nos pa tuma nota di nan punto di bista i ku takto hasi mas pregunta. Un komentario spontáneo di un doño di kas kisas ta revelá un kos ku ta preokupá hopi hende den e área i esei lo por habri kaminda pa duna un testimonio.
4 Kon pa Prepará un Presentashon: Nos por hasi uso di e buki Rasonamentu ora nos ta prepará pa sirbishi di vèlt den un mundu ku ta kambia konstant. Na página 9 i 11 (buki na spañó), bou di “Aktualidat” i “Krímen/Siguridat” nos ta haña sugerensianan práktiko enkuanto kon pa inkorporá susesonan aktual den nos presentashon. (Òf e foyeto chikí Con pa Cuminsá i Continuá Consideracionnan Bíblico, página 2 i 4.) Tambe nos por haña informashon similar den Nos Ministerio di Reino di sèptèmber 2000, página 4. Ora bo ta prepará bo presentashon, kòrda inkluí un teksto bíbliko apropiá.
5 Segun ku nos ta tuma nota di e kosnan ku ta preokupá e hendenan den nos teritorio, asuntunan ku konstant ta kambia, nos tin ku adaptá nos presentashon di e bon nobo di akuerdo ku esei. Asina nos ta papia ku hende tokante kosnan ku nan ta pendiente di dje i ku ta toka nan bida. Di e manera ei nos ta yuda hopi hende mas siña konosé Esun kende su kualidatnan i normanan no ta kambia.—Sant. 1:17.