Programa Nobo pa Dia Spesial di Asamblea

Awendia tin hopi informashon disponibel ku ta bisa nos pa mantené nos kurason literal den bon kondishon pa asina nos por biba mas dushi i mas largu. Pero loke ta mas importante ainda ta e kondishon spiritual di nos kurason. P’esei ta na su lugá ku e tema di e programa pa dia spesial di asamblea ku ta kuminsá na sèptèmber 2003 ta: “Sirbi Yehova ku Henter Nos Kurason.” (1 Kró. 28:9) Kiko nos por antisipá?

E superintendente di sirkuito lo papia tokante “Yuda Otro Hende Sirbi Yehova ku un Alma Gososo.” Entrevistanan lo resaltá e goso ku nos ta haña dor di kultivá interes i kondusí studio di Beibel ku hende ku kier sirbi Yehova. Tur presente sin duda lo saka konsuelo i animashon for di e promé diskurso di e oradó bishitante, titulá “Protehá Nos Kurason den un Mundu Trabahoso.” E seshon di mainta lo terminá ku e diskurso di boutismo.

Parti atardi, e diskurso “Duna un Man” lo trata kon nos por yuda otro rumannan. Kiko mayornan por hasi pa protehá kurason di nan yunan kontra mal influensia i yuda nan hala serka Yehova? E parti “Yuda Bo Yunan Haña Delisia den Yehova” lo duna sugerensianan práktiko i lo demostrá kon por hasi esaki.

Nos ta probechando di tur perkurashon ku Yehova ta hasi pa mantené nos kurason spiritualmente salú i fuerte? E último diskurso di e oradó bishitante, “Sigui Sirbi Yehova ku Henter Nos Kurason,” lo enfoká riba kuater aspekto esensial di nos programa di mantenshon spiritual. Kuantu tempu i esfuerso nos ta dediká na orashon sinsero, na studia e Palabra di Dios, na prediká ku selo i na asosiá ku otro rumannan kristian? Nos por mehorá riba e terenonan aki?

Yehova ta duna e invitashon: “Dirigí bo kurason na instrukshon, i bo oreanan na palabranan di konosementu.” (Pro. 23:12) Plania awor pa asistí na e dia benefisioso ei di instrukshon bíbliko. Hasiendo esei lo fortalesé bo pa sigui sirbi Yehova ku henter bo kurason i ku un alma gososo.