Benefisiá dor di Studia e Buki Hala Serka Yehova
1 Nos a keda masha emoshoná na e Kongreso di Distrito “Proklamadónan Seloso dje Reino,” ora ku nos a risibí e buki Hala Serka Yehova. Hopi di nos a lesa e buki mesora. E teksto di aña pa 2003: “Hala serka Dios i e lo hala serka boso,” siguramente a motivá hopi ruman mas pa les’é.—Sant. 4:8.
2 Den luna di mart nos lo kuminsá konsiderá e buki Hala Serka Yehova na Studio di Buki di Kongregashon. Kon nos por saka mayor benefisio for di nos studio? Preparashon ta esensial. Lo tuma dos siman pa trata kada kapítulo, pues lo tin relativamente tiki paragraf programá pa e studio di kada siman. Esaki ta permití sufisiente tempu pa bo por duna komentarionan sinsero basá riba e informashon ku bo a studia i meditá ariba. Ademas, durante e simannan ku lo repasá e último parti di un kapítulo, lo tin asta ménos paragraf pa konsiderá. Esaki ta pa por tin mas tempu pa dediká na un rasgo spesial di e buki.
3 Kuminsando ku kapítulo 2, e kuadro titulá “Pregunta pa Meditá Ariba” ta aparesé kasi na final di kada kapítulo. Despues di a konsiderá e último paragraf den e kapítulo, e superintendente di studio di buki lo trata e kuadro huntu ku e grupo. Lo e animá miembronan di e grupo pa ekspresá nan pensamentunan, pa nan menshoná e bon puntonan ku nan a haña durante nan meditashon riba e Skritura. (Pro. 20:5) Fuera di hasi e preguntanan ku tin den e kuadro, de bes en kuando e por hasi preguntanan manera lo siguiente: “Kiko e informashon aki ta siña bo tokante Yehova? Ki efekto e tin riba bo bida? Kon bo por us’é pa yuda otro hende?” Su meta lo ta pa stimulá e rumannan pa duna komentarionan sinsero i no pa tèst e grupo riba detayenan di ménos importansia.
4 E buki Hala Serka Yehova ta úniko. Ounke tur e publikashonnan di “e esklabo fiel i prudente” ta glorifiká Yehova, e buki aki ta kompletamente dediká na analisá e kualidatnan di Yehova. (Mat. 24:45-47) Ki un oportunidat emoshonante tin nos dilanti! Nos lo benefisiá rikamente di un studio profundo di Yehova su personalidat. Laga e studio aki yuda nos hala mas serka nos Tata selestial, i bira mas efikas den yuda otro hende hasi meskos.