Entrante e Siman di 6 di Yanüari Nos Lo Studia e Buki Hala Serka Yehova
1. Entrante e siman di 6 di yanüari, ki oportunidat nos lo haña pa hala serka Dios?
1 Yehova ke pa nos hala serka dje. (Sant. 4:8) Pa yuda nos ku esaki, entrante e siman di 6 di yanüari, nos lo studia e buki Hala Serka Yehova na e Estudio di Beibel di Kongregashon. E página di introdukshon ta bisa di su propósito: “Ora nos meditá riba e manera ku Yehova ta manifestá kada un di su kualidatnan, kon Hesukristu a reflehá nan perfektamente, i ora nos komprondé kon nos tambe lo por kultivá nan, nos lo hala mas serka Dios.” Nos a yega di studia e buki akí kaba durante 2004 i 2005 den kongregashon. Pero pa e rònt di dos mion publikadó ku a bini den e bèrdat despues di e añanan ei, esaki lo ta e promé biaha ku nan lo bai analisá e bunita kualidatnan di Yehova en detaye. Pa esnan ku a studia e buki akí kaba, e ripitishon lo oumentá nan apresio pa e kualidatnan di Yehova.—Sal. 119:14.
2. Kon nos lo studia Hala Serka Yehova?
2 Kon Nos Lo Studia e Buki Akí? E konduktor lo kuminsá ku un introdukshon breve, kisas di un òf dos frase. Komo ku den e buki no ta pará ki teksto mester lesa, e konduktor tin ku skohe e tekstonan klave pa lesa durante di e estudio. Na final di kada estudio, e por hasi un òf dos pregunta di repaso. Si den e informashon ku tin ku studia tin e kuadro “Pregunta pa Meditá Ariba,” por usa esaki pa e repaso. Si tempu permití, e konduktor por laga lesa algun di e tekstonan menshoná den e kuadro i despues hasi algun pregunta adishonal pa e presentenan kontestá.
3. Miéntras nos ta studia e buki akí, kiko nos mester hasi i dikon?
3 Kon Nos Por Benefisiá Plenamente? Prepará di antemano, asta si bo a yega di studia e buki kaba. Partisipá ku bo komentarionan i asina duna alabansa na Yehova. Tambe nan lo yuda bo kòrda e informashon i sirbi komo estímulo pa otronan. (Sal. 35:18; Heb. 10:24, 25) Ora bo meditá riba e kualidatnan inigualabel di Yehova, lo bo hala serka dje. (Sal. 77:11-13) Komo resultado, lo bo ta mas determiná pa obedesé su mandamentunan i mas motivá pa konta otro hende tokante dje.—Sal. 150:1-6.