Programa Nobo pa Asamblea di Sirkuito

Den ‘e último dianan ku tempunan trabahoso’ aki, nos tin mester di e sabiduria divino pa haña i keda ku Yehova su aprobashon. (2 Tim. 3:1) E programa di asamblea di sirkuito pa e aña di sirbishi 2005 lo enkurashá nos i duna nos konseho práktiko segun ku e ta desaroyá e tema “Sea Guiá pa ‘e Sabiduria di Ariba.’”—Sant. 3:17.

E promé simposio, “Kon pa Manifestá ‘e Sabiduria di Ariba’ den Nos Bida,” lo yuda nos komprondé kiko ta enserá ser puru, pasífiko, rasonabel i kla pa obedesé. Despues e superintendente di sirkuito lo presta atenshon na tres otro aspekto di sabiduria di Dios. Na final di e di promé dia, e superintendente di distrito lo mustra kon ministernan kristian ta ekipá pa papia sabiduria di Dios, ounke algun hende por konsiderá nan komo personanan ku no ta “eduká ni siñá.”—Echo. 4:13.

Riba e di dos dia un simposio ku e título “Sigui Tras di e Kosnan Ku Ta Edifiká,” lo yuda nos identifiká i evitá kosnan ku por debilitá nos spiritualmente. Tambe e ta mustra nos kon nos por edifiká otro hende na e reunionnan di kongregashon, den sirbishi di vèlt i den sírkulo di famia. E diskurso públiko, “Kon Sabiduria Divino Ta Benefisiá Nos,” lo profundisá nos apresio pa e benefisionan ku nos ta risibí segun ku nos ta apliká prinsipionan divino den nos bida. E diskurso final, “Aktuando na Armonia ku Sabiduria Divino Ta un Protekshon pa Nos,” lo fortalesé nos determinashon pa akudí na Yehova pa haña sabiduria durante e último dianan aki.

Un okashon sobresaliente di kada asamblea ta e boutismo di disipelnan nobo. Durante e programa lo tin tambe e Skol di Ministerio Teokrátiko i e Studio di Toren di Vigilansia pa e siman ei. Yehova ta deseá pa nos tur saka benefisio di e sabiduria ku e ta duna. E animashon i konsehonan ku ta spera nos na nos asamblea di sirkuito lo hasi nos riku spiritualmente.—Pro. 3:13-18.