Un Asamblea di Sirkuito pa Yuda Nos Protehá Nos Spiritualidat
1. Kua ta un manera ku Yehova ta perkurá pa nos haña loke nos tin mester pa kumpli ku nos asignashon di plama e bon nobo?
1 Yehova generosamente ta perkurá pa nos haña e informashon, entrenamentu i animashon nesesario pa nos por kumpli ku e asignashon ku el a duna nos di plama e bon nobo. (Mat. 24:14; 2 Tim. 4:17) I un manera ku e ta perkurá pa nos haña tur e kosnan ei ta mediante nos asamblea di sirkuito anual. E programa nobo pa e aña di sirbishi 2010 lo trata e tema “Protehá Bo Spiritualidat,” basá riba Romanonan 8:5 i Hudas 17-19. E ta programá pa kuminsá e siman di 31 di ougùstùs 2009.
2. (a) Ki benefisio nos lo por saka for di e asamblea di sirkuito? (b) Kon asambleanan di sirkuito a yega di yuda bo den e ministerio?
2 Kon Nos Lo Benefisiá: E programa lo konsientisá nos di peligernan, manera distraishonnan ku por kita tur nos tempu i kita nos atenshon for di loke ta realmente importante. Nos lo siña kon pa kontrarestá un aktitut permisivo, i nos lo konsiderá kiko ta karakterístikanan di un persona spiritual. E simposio riba djadumingu lo mustra kon tantu hende individual komo famianan por fortalesé nan spiritualidat apesar ku nan ta konfrontá mas i mas preshon i prueba severo di nan fe. E programa lo yuda nos protehá nos kurason, keda spiritualmente saludabel i tene bibu den nos mente e magnífiko bendishonnan ku ta spera esnan ku ta protehá nan spiritualidat.
3. Ki dia boso tin e siguiente asamblea di sirkuito, i kiko bo mester ta determiná pa hasi?
3 Asina ku boso haña sa ki dia i na unda lo tene boso siguiente asamblea di sirkuito, regla bo asuntunan pa bo ta presente i atento durante tur e seshonnan di ámbos dia. Boso por tin sigur ku Yehova ta bendishoná esnan ku ta diligente.—Pro. 21:5.
4. Nos por tin sigur ku nos lo risibí kiko na nos siguiente asamblea di sirkuito?
4 Sí, Yehova ta e Perkurador di e bon regalo akí. E programa ku e esklabo fiel a prepará ta presis loke nos tin mester pa sigui kumpli ku nos ministerio kristian. Nos ta gradisidu na Yehova pa tur loke e ta proveé pa yuda nos “tene firme na e konfeshon di nos speransa sin vasilá.”—Heb. 10:23-25; Sant. 1:17.