Protehá Bo Mente
1. Kiko ta e tema di e asamblea di sirkuito pa aña di sirbishi 2013, i kiko ta e propósito di e programa?
1 Hesus a siña su disipelnan pa stima Yehova ku henter nan kurason, alma i mente. (Mat. 22:37, 38) A prepará tantu e kongreso komo e asambleanan di e aña akí pa yuda nos fortalesé e persona ku nos ta di paden. Manera nos por kòrda, e tema di nos kongreso di distrito tabata “Protehá Bo Kurason!” Esun di e dia spesial di asamblea pa aña di sirbishi 2013 ta “Protehá Bo Konsenshi.” I e tema di e seri di asamblea di sirkuito, ku lo kuminsá na òktober, lo ta “Protehá Bo Mente,” i e ta basá riba Mateo 22:37. A prepará e programa akí pa yuda kada un di nos analisá nos pensamentunan ku e meta pa hasi nos manera di pensa agradá Yehova mas ainda.
2. Ki preguntanan lo keda kontestá durante e programa?
2 Loke Lo Ser Analisá: Den e asamblea akí nos lo haña kontesta pa nuebe pregunta, ku ta e puntonan prinsipal di e programa:
• Kon nos por evitá di tin e ‘pensamentu di hende’?
• Kon nos por yuda kita e velo ku ta siega mente di hende ku no ta kreyente?
• Ki aktitut mental nos ke tin?
• Kon e tipo di meditashon korekto ta benefisiá nos?
• Kon nos por laga Yehova forma nos manera di pensa?
• Kon esposo-, esposa-, mayor- i yunan por kontribuí na e felisidat di nan famia?
• Kon nos por ta prepará pa e dia di Yehova?
• Kiko ta nifiká faha nos mente pa aktividat?
• Ki benefisio hende ku ta apliká loke nan ta siña lo haña?
3. Pakiko ta importante pa nos t’ei tur dos dia, presta bon atenshon i apliká loke nos siña?
3 Satanas ke korumpí nos mente i ta hasi tur su esfuerso pa logra esei. (2 Kor. 11:3) P’esei nos tin ku protehá nos mente, kontrolá nos pensamentunan, sigui reflehá e mente di Kristu i rechasá e influensia di e mundu malbado akí. (1 Kor. 2:16) Pues, hasi sigur pa bo t’ei tur e dos dianan di e asamblea di sirkuito i presta bon atenshon. Ora nos apliká e informashon importante ku nos lo risibí na e asamblea, esei lo yuda nos faha nos mente pa traha ku zelo den sirbishi di Reino.—1 Ped. 1:13.