E Palabra di Dios Ta Probechoso pa Siña Hende
1. Kiko ta e tema di e asamblea di sirkuito pa e aña di sirbishi 2014, i nos lo haña kontesta pa kua pregunta?
1 Yehova ta e mihó maestro den universo. (Isa. 30:20, 21) Pero kon Yehova ta siña nos? El a duna nos un buki ku ta superior na tur otro—su Palabra inspirá, Beibel. Kon asina nos por benefisiá di su siñansa den sentido físiko, mental, emoshonal i spiritual? Nos lo trata e kontesta pa e pregunta akí na nos asamblea di sirkuito pa e aña di sirbishi 2014. E tema ta “E Palabra di Dios Ta Probechoso pa Siña Hende” i e ta basá riba 2 Timoteo 3:16.
2. Kontesta pa ki preguntanan lo enfatisá e puntonan prinsipal?
2 Puntonan Prinsipal Ku Lo Ser Tratá: E kontestanan ku nos lo haña riba e siguiente preguntanan lo resaltá e puntonan prinsipal di e programa:
• Ki efekto siñansa di Dios tin riba nos bida? (Isa. 48:17, 18)
• Kiko nos por ta sigur di dje ora nos hasi kambio den nos bida pa por sirbi Yehova den e trabou di tempu kompleto? (Mal. 3:10)
• Kon nos mester reakshoná ora nos haña nos ku “siñansa straño”? (Heb. 13:9)
• Kon nos por imitá Hesus su “manera di siña hende”? (Mat. 7:28, 29)
• Dikon rumannan ku ta siña e kongregashon mester siña nan mes? (Rom. 2:21)
• Pa kiko e Palabra di Dios ta probechoso? (2 Tim. 3:16)
• Ki efekto e ‘sagudimentu’ di e nashonnan tin riba hende? (Hag. 2:6, 7)
• Ki konfiansa Yehova tin den nos? (Efe. 5:1)
• Dikon nos mester traha duru pa keda den e siñansa di Yehova? (Luk. 13:24)
3. Pakiko ta importante pa nos asistí i presta bon atenshon na e programa akí?
3 Nèt promé ku Pablo a skirbi e palabranan na 2 Timoteo kapítulo 3, ku ta base pa e tema di e programa akí, el a deskribí e tempunan krítiko ku ta karakterisá e último dianan. El a skirbi: “Hende malbado i gañadónan lo bai di malu pa pió, gañando otronan i siendo engañá.” (2 Tim. 3:13) Pa nos no ser engañá, ta hopi importante pa nos skucha i apliká Dios su siñansa! P’esei, laga nos ta determiná pa asistí i presta bon atenshon na e programa akí ku a ser prepará nèt na ora pa nos.