Mas Énfasis Riba Beibel!
1 Promé di òktober 1919, a publiká e promé edishon di e revista E Époka di Oro. El a resultá di ta un instrumento masha balioso den e trabou di prediká. Dikon? Pasobra e tabata spesialmente prepará pa públiko en general. Esei no tabata e kaso ku E Toren di Vigilansia, ku pa hopi aña e rumannan tabata konsiderá komo un revista prinsipalmente pa e “tou chikitu.” (Luk. 12:32) Publikadónan di Reino a reakshoná ku un entusiasmo asina grandi riba e publikashon nobo ku pa hopi aña e kantidat di E Époka di Oro ku nan a distribuí tabata hopi mas tantu ku esun di E Toren di Vigilansia.
2 E propósito di e revista E Époka di Oro tabata pa mustra hende ku e berdadero solushon pa e problemanan di humanidat ta e Reino di Mil Aña di Kristu. E Reino aki realmente lo trese un époka di oro pa humanidat. Durante e dékadanan ku a sigui, E Époka di Oro a konosé un kantidat di ahuste pa asina satisfasé e nesesidatnan ku a kambia atraves di tempu. Na 1937 su nòmber a kambia i a bira Konsuelo. I na 1946 el a bira Spièrta!, e nòmber pa kua e ta konosí awe.
3 Desde su prinsipio, e revista aki a kontribuí masha hopi na e gran testimonio ku a ser duná for di 1919 en adelante. (Mat. 24:14) Sin embargo, en bista di e urgensia di nos tempu, ta parse ku ta sabí pa ahustá Spièrta! ainda mas.
4 Miónes di hende ta gusta lesa Spièrta! pasobra e ta trata na un manera interesante un gran variedat di tópiko no-religioso. Sin duda, mayoria di e personanan ku ta asistí tur aña na Memorial ta hendenan ku ta lesa Spièrta! regularmente. Sin embargo, si un persona ta spera di ser skondí riba ‘e dia di e rabia di Yehova,’ lo e tin mester di yudansa pa por hasi mas ku djis lesa nos publikashonnan regularmente.—Sof. 2:3; Rev. 14:6, 7.
5 P’esei, kuminsando ku e edishon di yanüari 2006, Spièrta! lo pone mas énfasis riba e Reino di Dios. Lo e animá e lektornan na un manera mas direkto pa akudí na Beibel pa haña solushon pa nan problemanan, i di un manera notabel lo e resaltá e splikashon ku Beibel ta duna pa susesonan aktual. Di e manera aki, e lektornan lo haña un mihó komprondementu di e susesonan aktual i kisas loke nan lesa ta motivá nan pa siña mas tokante Yehova.—Zak. 8:23.
6 Spièrta! lo sigui bin ku tópikonan di interes general. Sin embargo, lo pone mas énfasis riba Beibel. (1 Tes. 2:13) Pero siendo ku E Toren di Vigilansia ta kontené informashon bíbliko profundo i Spièrta! lo presentá mas informashon ku ta basá riba e Skritura, no ta parse nesesario pa sigui publiká Spièrta! dos bes pa luna. P’esei, kuminsando ku e edishon di yanüari 2006, lo publiká Spièrta! un bes pa luna. Esaki lo resultá den un simplifikashon enorme den preparashon, tradukshon i mandamentu di nos literatura.
7 E kambio aki lo afektá rònt di 40 porshento di idioma den kua Spièrta! ta ser publiká. Den mayoria idioma, ya kaba ta publiká Spièrta! un bes pa luna òf kada tres luna. Pero lo no tin kambio den e publikashon di E Toren di Vigilansia.
8 Publikadónan lo por ofresé e Spièrta! mensual huntu ku un di e dos edishonnan di E Toren di Vigilansia di e luna ei. Esnan ku ta ofresé Spièrta! lo por usa e mesun edishon durante henter luna sin ku nan tin ku kambia nan presentashon meimei di luna manera ta e kaso aktualmente.
9 For di su promé edishon aya na 1919, e revista aki ku respektivamente tabata konosí komo E Époka di Oro, Konsuelo, i awor komo Spièrta!, a hunga un papel importante den e trabou di prediká. Nos ta resa pidi Yehova p’e sigui bendishoná e distribushon di e revista den su forma revisá i ku esaki lo yuda hopi hende mas di “tur nashon i tur tribu i pueblo i lenga” akudí na e Reino di Dios komo nan úniko speransa.—Rev. 7:9.
[Study Questions]
1. Na kuminsamentu, pa ken prinsipalmente tabata publiká E Toren di Vigilansia, i pa ken E Époka di Oro?
2. Ki nòmber E Époka di Oro tin awe, i kiko tabata su propósito desde prinsipio?
3. Den kumplimentu di kua profesia Spièrta! a sirbi komo un instrumento poderoso?
4. (a) Kiko un persona mester hasi si e ke ser skondí riba ‘e dia di e rabia di Yehova’? (b) Segun Revelashon 14:6 i 7, kiko e ‘angel ku ta bula meimei di shelu’ ta pidi tur hende hasi?
5. (a) Kuminsando ku e edishon di yanüari 2006, kiko e Spièrta! lo presentá di un manera mas notabel? (b) Kiko hopi hende kisas lo ser motivá pa hasi, i ku kua profesia nan ta kumpli dor di hasi esei?
6, 7. (a) Kon Spièrta! lo purba yuda hopi hende apliká 1 Tesalonisensenan 2:13? (b) Ku ki frekuensia lo publiká Spièrta!, i esaki lo afektá kuantu idioma?
8. Kon e publikadónan lo por usa Spièrta! huntu ku E Toren di Vigilansia?
9. Ki papel Spièrta! lo sigui hunga?