Alkansá Mas Tantu Hende Posibel
1 Hesus su promé siguidónan sinseramente a buska maneranan pa plama e mensahe di Reino. Nan a usa medionan efikas pa mas tantu hende posibel haña e bon nobo. E kristiannan ku a skirbi Beibel a skirbi nan bukinan inspirá den e griego komun ku tabata e idioma internashonal di e Imperio Romano. Ademas, kisas ta e predikadónan seloso di siglo 2 i 3 di nos era padilanti, tabata e proménan ku a usa kodèks. E sistema aki a hasi buskamentu di referensia mas fásil ku e uso di ròl.
2 Uso di Teknologia: Mediante profeta Isaias, Yehova a predisí: “Lo bo chupa lechi di nashonnan.” (Isa. 60:16) Den kumplimentu moderno di e profesia aki, Yehova su sirbidónan ta hasi uso di e rekursonan balioso di e nashonnan pa promové e trabou di prediká. Por ehèmpel na 1914, añanan promé ku pelíkula a bira un éksito komersial, Studiantenan di Beibel a kuminsá pasa e “Foto-Drama di Kreashon.” E pelíkula i programa di slide aki di un durashon di ocho ora, kompletamente na koló i ku zonidu, a duna un testimonio poderoso na miónes di hende.
3 Awendia, e pueblo di Dios ta usa mashin di imprenta di alta velosidat i sistema avansá di kòmpiuter pa produsí Beibel i literatura bíbliko den sentenáres di idioma. Ku medionan di transporte rápido nan ta manda literatura bíbliko pa partinan leu di tera, alkansando hende den 235 pais. Mediante su spiritu, Yehova a impulsá su sirbidónan pa usa e teknologia ei na un manera efektivo pa hasi e bèrdat di Beibel disponibel pa mas hende ku nunka promé den historia.
4 Ahustenan Personal: Berdadero adoradónan a ser motivá tambe pa hasi ahustenan personal pa nan por alkansá mas hende ku e bon nobo. Hopi di nan a simplifiká nan bida pa nan por partisipá mas plenamente den e trabou di prediká. Algun a muda bai kaminda tin mas nesesidat di proklamadó di Reino. Otronan a ekspandé nan ministerio dor di siña un otro idioma.
5 Ademas, nos por alkansá mas hende ku e bon nobo dor di prediká ora tin hende na kas i kaminda nos por haña nan. Si durante dia hopi biaha e hendenan den bo teritorio no ta na kas, lo bo por kambia bo orario pa duna testimonio anochi trempan? Tin lugánan públiko kaminda lo bo por duna testimonio? Bo a yega di purba duna testimonio via telefon i den teritorio di negoshi? Bo ta buska oportunidat pa duna testimonio informal?
6 Nos ta masha privilegiá di por partisipá den e gran testimonio ku ta ser duná di e nòmber di Yehova i su Reino! Laga nos sigui kompartí e bèrdat di e Palabra di Dios ku ta duna bida, ku mas tantu hende posibel.—Mat. 28:19, 20.
[Study Questions]
1. Kiko e promé kristiannan a hasi pa alkansá mas tantu hende posibel ku e bon nobo?
2, 3. (a) Kon Isaias 60:16 ta haña su kumplimentu den tempu moderno? (b) Kon e pueblo di Dios ta usa teknologia pa promové adorashon puru?
4. Ki ahustenan algun ruman a hasi den nan bida pa nan alkansá mas hende ku e bon nobo?
5, 6. Kiko nos por hasi pa alkansá mas tantu hende posibel den nos teritorio?