“Hasi Tur Kos pa Kousa di Evangelio”

1. Kiko un predikadó di Reino ta dispuesto pa hasi pa otro hende, i dikon?

¹ Apòstel Pablo a sinti ku e tabatin e obligashon di prediká e Evangelio òf bon nobo na otro hende. (1 Kor. 9:​16, 19, 23) Nos interes den e bienestar eterno di hende ta motivá nos tambe pa hasi esfuerso èkstra pa prediká e bon nobo na nan.

2. Ki ahuste nos ta dispuesto pa hasi ora nos ta prediká, i dikon?

² Prediká na e Ora i Lugá Ku Bo Por Haña Hende: Un bon piskadó ta tira su liña òf reda, no na e lugá i ora ku ta kumbinié, sino na e lugá i ora ku e tin mas chèns di haña piská. Nos tambe komo “piskadó di hende” kisas mester hasi algun ahuste personal pa nos por logra haña hende den nos teritorio i di e manera ei haña mas satisfakshon den e trabou spesial di “kohe tur sorto di piská.” (Mat. 4:⁠19; 13:⁠47) Pa nos logra haña hende, nos lo por prediká atardi lat di kas pa kas òf mainta trempan riba kaya? Pablo su meta tabata pa ‘duna testimonio kabal di e evangelio,’ i el a probechá di tur oportunidat pa hasi esei.​—⁠Echo. 17:⁠17; 20:​20, 24.

3, 4. Kon nos por adaptá nos presentashon ora nos ta den sirbishi, i ku ki resultado?

³ Adaptá Bo Presentashon na e Nesesidat: Piskadó hopi bes ta ahustá nan manera di piska pa nan logra haña sierto tipo di piská. Kon nos por presentá e bon nobo di Reino na un manera ku lo atraé hende den nos teritorio? Ku takto introdusí un tópiko ku lo interesá mayoria di hende den bo área i skucha bon kiko nan ta bisa di e asuntu. (Sant. 1:⁠19) Pa nos haña sa kiko nan ta pensa, nos lo por puntra nan pa duna nan opinion. (Pro. 20:⁠5) Esei por yuda nos adaptá nos presentashon di e bon nobo di tal manera ku nos lo por tin efekto riba nan. Pablo “a bira tur kos pa tur hende.” (1 Kor. 9:⁠22) Ta masha importante pa nos ta fleksibel si nos ke logra yega na kurason di hende.

⁴ Ta un goso pa kompartí “bon nobo di felisidat” ku otro hende! (Isa. 52:⁠7) Laga nos “hasi tur kos pa kousa di evangelio” pa nos logra alkansá mas tantu hende posibel.​—⁠1 Kor. 9:⁠23.