Bo Ta Usa e Pamfletanan di Invitashon?

Un dia un mucha hòmber di 11 aña a haña un pamfleta di invitashon ku tabata anunsiá un diskurso públiko riba e tópiko di fièrnu. Despues el a splika: “E tópiko ei tabata interesá mi mashá, pasobra a parse ku semper mi tabata hasi loke ta robes, i p’esei mi tabata masha preokupá ku si ora mi muri lo mi a bai un fièrnu di kandela.” El a bai skucha e diskurso, i denter di mas o ménos un aña, despues di vários seshon di estudio di Beibel, el a batisá. Esei tabata inisio di e karera kristian di Karl Klein, kende despues a sirbi pa hopi aña komo miembro di e Kuerpo Gobernante di Testigunan di Yehova. Tur kos a kuminsá ku un pamfleta di invitashon.

Awe e pamfletanan di invitashon ketu bai ta un hèrmènt efikas pa duna testimonio. Hopi publikadó ta haña ku un bon manera pa nan introdusí nan mes i kuminsá un kòmbersashon ku un persona ta dor di duna nan un pamfleta. Mayornan por enbolbé nan yunan chikitu den e ministerio dor di laga nan ofresé un pamfleta di invitashon na porta. Publikadónan ku ta duna testimonio via karta, por laga hende sa di nos e reunionnan dor di inkluí un di e pamfletanan aki huntu ku e karta. I klaru ku pamfletanan di invitashon ta un bon manera pa invitá studiantenan di Beibel i otro hende interesá na nos reunionnan.

Parti dilanti di e pamfleta tin un deskripshon breve di kada reunion di kongregashon. Ya ku e pamfleta no ta menshoná e adrès di Salòn di Reino ni orario di e reunionnan, abo lo tin ku duna e informashon ei ora bo ta ofresé e pamfleta. Riba e pamfleta tin espasio pa skirbi òf stèmpel e informashon ei si bo ta deseá esei. Bo ta hasiendo bon uso di e pamfletanan di invitashon den bo ministerio?