Kampaña Mundial pa Anunsiá e Kongreso di Distrito “Sigui e Kristu!”
Publikadónan Lo Bolbe Distribuí un Pamfleta Spesial
1 Aña pasá e kampaña mundial pa anunsiá e Kongreso di Distrito “Liberashon Ta Serka!” a hasi un impakto riba personanan interesá. Esnan ku a aseptá e invitashon i a bini a eksperensiá pa promé bes un bankete spiritual riku huntu ku Testigunan di Yehova. (Isa. 65:13) Nan a disfrutá di nos hermandat kristian kaluroso i uní. (Sal. 133:1) Pa yuda mas tantu hende posibel asistí na e Kongreso di Distrito “Sigui e Kristu!” nos lo bolbe partisipá den e distribushon mundial di un pamfleta spesial.
2 Resultadonan di Aña Pasá: Segun e informenan ku a bini for di tur parti di mundu, e kampaña pa anunsiá e Kongreso di Distrito “Liberashon Ta Serka!” tabatin resultadonan ekselente. Den hopi área nos a risibí publisidat positivo. Por ehèmpel, den un stat un korant a publiká un artíkulo di seis kolumna relashoná ku e kampaña. E artíkulo a bisa: “Pa alkansá tur hende na tempu, e Testigunan den bisindario a hasi un esfuerso èkstra; nan a traha mas tantu ora, a kana distansianan mas largu i a papia mas lihé.” E kampaña kordiná pa distribuí e pamfleta a lanta interes di medionan di komunikashon den un otro stat asina tantu ku nan a duna un reportahe amplio di dje. Por lo ménos tres korant a papia bon di nos aktividat promé ku e kongreso. Un reportero a skirbi vários artíkulo ekstenso ku a kubri mas ku dos página den e edishon di djadumingu di un korant. E korant a splika tokante nos kreensianan, nos hermandat, e distribushon di e pamfleta i e kongreso. Ora un publikadó tabata presentá e invitashon na un kas, e doño di kas a interumpié i a bisa: “Ahan! Ta nèt mi tabata lesa tokante dje den korant!” Un otro doño di kas a bisa emoshoná: “Ta nèt mi ta lesando tokante boso, i ata boso aki! Esaki ta mi invitashon?” Kaba el a agregá: “Testigunan di Yehova ta hasiendo algu masha bunita!”
3 Hopi di e personanan interesá a bini e kongreso ku e invitashon den nan man. Algun di nan a biaha for di statnan leu pa nan por a asistí na e seshonnan. Nos esfuersonan diligente pa invitá otro hende a kontribuí na un oumento den e asistensia. Ehèmpel di esaki ta un pais ku tabatin 27 porshento mas tantu hende presente na e kongreso ku e aña anterior.
4 Kon pa Kubri e Teritorionan: Boso por kuminsá distribuí e pamfleta tres siman promé ku boso kongreso. Mester hasi tur esfuerso pa kubri henter e teritorio di e kongregashon. Den kaso di kongregashonnan ku tin hopi teritorio, e publikadónan por laga e pamfleta na un manera diskreto kaminda nan no haña hende na kas, durante e último siman promé ku e kongreso. Kongregashonnan mester hasi esfuerso pa distribuí tur e pamfletanan i kubri mas tantu teritorio posibel. E pioneronan den e kongregashon por usa loke a sobra.
5 Loke Bo Por Bisa: Lo bo por bisa algu asin’aki: “Nos ta partisipando den un kampaña mundial pa distribuí e invitashon aki pa un evento importante ku ta na kaminda. Esaki ta pa bo. Riba dje lo bo haña mas detaye.” Si nos mantené nos presentashon breve, nos por parti hopi invitashon. Klaru ku si e doño di kas tin pregunta, bo tin ku tuma tempu pa kontestá nan. Tuma nota di e personanan ku a mustra interes i bai bèk mas pronto posibel serka nan.
6 Ta masha importante pa nos sigui Kristu! (Juan 3:36) I nos binidero kongreso di distrito lo yuda tur persona ku asistí, hasi netamente esei. Siguramente nos por antisipá ku e kampaña aki pa anunsiá e Kongreso di Distrito “Sigui e Kristu!” lo sirbi komo un tremendo testimonio atrobe. P’esei anto, ku entusiasmo, invitá mas tantu hende posibel pa asistí. Ku Yehova bendishoná bo esfuersonan personal rikamente, segun ku bo ta partisipá den e kampaña mundial uní aki.