Kampaña Mundial pa Anunsiá e Kongreso di Distrito “Liberashon Ta Serka!”
Publikadónan di Tur Kongregashon Lo Distribuí un Pamfleta Spesial
1 Den lènte di aña 2006 lo kuminsá un kampaña mundial den e Hemisferio Nort pa anunsiá pa medio di un pamfleta spesial e kongresonan di distritonan ku lo ser tené den 155 pais. E kampaña aki lo dura te ora ku tur e serinan di kongreso rònt mundu a tuma lugá. E ta konta tambe pa e kongresonan internashonal ku lo tuma lugá na Alemania, Repúblika Cheko i Polonia durante e luna di yüli i e promé simannan di ougùstùs 2006.
2 Nos ta bibando den e último parti di e tempu di fin. P’esei, e kongresonan aki ku ta enfatisá e liberashon ku Dios a primintí for di e mal sistema di kosnan aki, sigur lo interesá hende ku tin e disposishon korekto. E mensahe mester motivá nan pa pensa riba loke tin den futuro. Pa duna miónes di hende e oportunidat pa tende un mensahe di konsuelo i speransa, nos ta hasi un apelashon fuerte riba e mas ku 98.000 kongregashonnan di Testigunan di Yehova rònt mundu pa partisipá ku entusiasmo den e kampaña pa anunsiá e kongreso na kua nan ta invitá.
3 Kongregashonnan lo risibí sufisiente pamfleta pa asina tur publikadó por haña un máksimo di 50 pamfleta. E pioneronan di kongregashon por distribuí loke sobra. Den tur kongregashon e kampaña lo kuminsá tres siman promé ku e promé dia di e kongreso na kua e kongregashon mester asistí. Esaki lo duna nan sufisiente tempu pa kubrí mayoria di nan teritorionan, si no ta tur.
4 Ta rekomendabel, pa kaminda ta posibel, duna kada doño di kas e pamfleta personalmente. Sin embargo, den kaso ku no tin hende na kas bo por laga un pamfleta na un manera diskreto na e kas. Publikadónan mester hasi esfuerso diligente pa distribuí tur e pamfletanan durante e periodo ei di tres siman.
5 Nos tin konfiansa ku e esfuerso intensivo aki pa anunsiá e Kongreso di Distrito “Liberashon Ta Serka!” lo resultá den un tremendo testimonio manera e artíkulo aki ta mustra. Nos ta pidi Yehova bendishoná e esfuersonan personal ku boso ta hasi pa partisipá den e kampaña mundial aki.