Un Kampaña Ku Ta Duna Resultado

Tres siman promé ku nos kongreso kuminsá, nos lo partisipá un biaha mas den un kampaña pa invitá personanan interesá di e teritorio na e kongreso. Tin bon motibu pa tene e kampaña anual akí. Esnan ku aseptá e invitashon i asistí na e kongreso hopi biaha ta keda impreshoná ku e diskursonan basá riba Beibel, e trahadónan boluntario ku ta sirbi den departamentonan bon organisá i nos union i bon kondukta. (Sal. 110:3; 133:1; Isa. 65:13, 14) Pero kiko di lugánan kaminda hende interesá tin ku rekoré distansianan largu pa asistí na un kongreso? Ei tambe e kampaña ta duna resultado?

Despues di e kongreso di distrito 2011, un sukursal a risibí un karta di un señora ku a haña un invitashon ku nan a laga na su kas. E señora normalmente tabata skonde ora Testigunan di Yehova yama na su kas. El a skirbi: “Mi tin un bunita kas, un ekselente esposo, i m’a pensa ku mi tabatin tur loke por a hasi mi felis. Pero ta tristu pa bisa ku apesar di esei mi no tabata felis i mi bida no tabatin propósito. P’esei m’a disidí di kore 320 kilometer ku outo pa asistí na e programa di djasabra.” El a disfrutá asina tantu di e kongreso ku el a bèl su kasá pa bis’é ku e lo pasa anochi ei banda pa e por asistí na e programa di djadumingu tambe. “M’a skucha tur e diskursonan, m’a sera konosí ku hopi Testigu di Yehova i mi no tabata ke pa e kos akí yega na su fin.” Ora el a bai kas bèk, el a kuminsá studia i despues di kuater luna el a bira un publikadó no-batisá. “Mi ta masha kontentu ku m’a haña e invitashon ku nan a laga na mi kas, pasobra awor sí mi bida tin propósito!”

Algun hende ku haña e invitashon lo asistí. P’esei, partisipá ku entusiasmo den e kampaña importante akí. Si bo sobra invitashon, trese nan na e lugá di kongreso i usa nan pa duna testimonio informal.

[Kuadro na página 5]

Kon Nos Lo Ofresé e Invitashon?

Pa nos por kubri henter e teritorio, nos mester ta breve. Por ehèmpel, nos por bisa: “Kon ta bai? Rònt mundu Testigunan di Yehova ta partiendo e invitashon akí. Nos tin un pa bo tambe. Pa mas detaye, lesa e invitashon.” Sea entusiasmá. Ora bo ta parti e invitashon den wikènt, ofresé e revistanan tambe si ta apropiá.