Karta di Sukursal

Kerido Publikadónan di Reino,

Na komienso di e último aña di sirbishi, a forma un sirkuito nobo den e teritorio di nos sukursal, yegando na un total di tres sirkuito. Esaki a bira posibel ku e nombramentu di un superintendente di sirkuito nobo ku aktualmente ta sirbi kongregashonnan papiamentu i spañó riba tur tres isla. Durante e aña, Aruba a alkansá vários máksimo nobo di publikadó, i e total di islanan ABC tambe a alkansá un máksimo nobo di 2.291 publikadó na luna di mei 2005.

Rumannan a hasi un trabou sobresaliente tambe pa plama e bon nobo den e kampo spañó. Riba rekomendashon di e superintendente di sirkuito, Kongregashon Hispana riba e isla di Kòrsou a hasi areglo pa kuminsá ku un di dos Reunion Públiko i Estudio di Toren di Vigilansia. Na e promé reunion nan tabatin un asistensia sorprendente di 96 publikadó- i personanan interesá. Ademas, durante e último aña di sirbishi nos a sigui traha pa parti nos teritorio a base di e kuater idiomanan di nos kongregashonnan. Na Kòrsou, e kongregashonnan hulandes, ingles i spañó tur ta informá ku esaki a kontribuí na un kobertura mas efektivo di e teritorio i un oumento den e kantidat di estudio di Beibel ku ta ser kondusí. Den e lunanan binidero, nos tin ku sigui entregá ku diligensia tur adrès di otro idioma na e kongregashon di e idioma ei, usando e formulario S-43. Esei sigur lo kontribuí na un kresementu kontinuo.

Nos ta kontentu di por tin un pareha nobo ku ta sirbi komo Sirbidónan Internashonal na nos sukursal. Nan ta akinan pa no solamente yuda nos prepará, sino tambe konstruí e Salònnan di Reino ku nos tin asina tantu mester di dje. Nos lo informá boso despues di e progreso di e trabou aki i kon boso por duna boso aporte. Ki un gran privilegio nos tin di por ta parti di un amoroso hermandat kristian!—1 Ped. 2:17.

Tur e aktividat seloso aki pa e adelanto di interesnan di Reino ta digno di elogio! E sosten finansiero generoso ku boso ta duna na e trabou tambe ta ser apresiá mashá. (Pro. 3:9, 10) Yehova bendishoná nos esfuerso uní pa sirbi “pa e alabansa di su gloria.”—Efe. 1:12.

Boso rumannan,

Ofisina di Sukursal di Kòrsou