Un Skol Ku Ta Yuda Nos Hasi Aplikashon Práktiko
1 Segun ku nos ta konsiderá e material den e Programa pa Skol di Ministerio Teokrátiko pa 2006, nos ta hasi esfuerso pa benefisiá di siñansa bíbliko dor di apliká nan den nos sirbishi sagrado i nos bida diario. Nos ta determiná pa praktiká loke nos ta siña.—Juan 13:17; Fil. 4:9.
2 Dunamentu di Komentario: E programa di e aña aki a asigná un minüt adishonal na partisipashon di ouditorio den puntonan sobresaliente di Beibel. Esaki ta nifiká ku e ruman ku tin ku presentá e puntonan sobresaliente mester sòru kompletá su porshon den sinku minüt en bes di seis minüt. Esnan ku ta duna komentario for di nan asiento tambe mester tene kuenta ku nan tempu. Dor di plania bon di antemano, esun ku ta duna komentario lo por ekspresá informashon útil den 30 sekònde òf ménos. Esaki lo permití sufisiente tempu pa dies persona komentá durante e sinku minütnan asigná pa partisipashon di ouditorio.
3 Diskursonan Instruktivo: Puntonan sobresaliente di Beibel i e diskurso di instrukshon mester enfoká riba e balor di e informashon manera e ta apliká na nos ministerio i otro aspektonan di nos bida diario. Un oradó mester hasi mas ku djis stimulá den su oyentenan e deseo di aktua. E mester indiká spesífikamente ki akshon ta nesesario, mustra kon por logr’é i hala atenshon na e benefisionan di tuma tal akshon. Lo e por bisa: “Esaki ta e manera ku e teksto aki ta perkurá guia pa nos,” òf “Esaki ta e manera ku nos lo por usa e versíkulonan aki den sirbishi.” Ansianonan i sirbidónan ministerial ku ta na altura di sirkunstansianan lokal mester trata di hasi e aplikashon práktiko di e informashon mas spesífiko posibel.
4 Un manera hopi efektivo di hasi aplikashon práktiko ta dor di sita ehèmpelnan bíbliko. Despues ku un oradó a referí na un ehèmpel den Beibel, lo e por bisa: “Boso tambe por haña boso den un situashon paresido na esaki.” E mester hasi sigur ku kualke aplikashon di e ehèmpel bíbliko ta na armonia ku e konteksto i ku Beibel den su totalidat i tambe ku loke a keda publiká dor di “e esklabo fiel i prudente.”—Mat. 24:45.
5 Sabiduria ta e kapasidat di usa konosementu i komprondementu ku éksito. “Sabiduria ta e kos prinsipal.” (Pro. 4:7, NW) Segun ku nos ta sigui haña sabiduria práktiko mediante nos lèsnan den e Skol di Ministerio Teokrátiko, laga nos mehorá tambe e arte di kompartié ku otro hende.