Nan A Pone Ehèmpel di Fieldat
1 Na 1937 a introdusí un rasgo nobo di e sirbishi di tempu kompletu: e aktividat di pionero spesial. Hòmber- i muhénan kapas, ku eksperensia den e ministerio kristian, boluntariamente a aseptá asignashonnan pa sirbi kaminda e organisashon a manda nan. Awe, dékadanan despues, pioneronan spesial ta sigui pone ehèmpel di fieldat ku ta digno di imitá.—Heb. 6:12.
2 Nan A Sali Padilanti: Na prinsipio, pioneronan spesial a enkabesá e trabou di prediká dor di usa tokadiskonan portátil na kas di hende. Ora di hasi rebishita tambe nan tabata usa diskursonan grabá komo base pa nan kòmbersashonnan bíbliko. Nan a hasi esaki den statnan grandi kaminda tabatin kongregashonnan establesí kaba. Despues a kuminsá manda pioneronan spesial den áreanan kaminda tabatin mester di mas proklamadó di Reino. Nan a sigui bishitá tur hende ku a mustra interes i a kondusí estudionan di Beibel. Komo resultado di nan esfuersonan sinsero, sentenáres di kongregashon nobo a ser formá. Nan trabou inkansabel di plama e bon nobo a kontribuí na e tremendo ekspanshon di e organisashon ku nos ta mira awe. (Isa. 60:22) Pioneronan spesial ta sigui hunga un papel importante den plama e bon nobo “den henter kreashon bou di shelu.”—Kol. 1:23.
3 Digno di Imitá: Algun pionero spesial tin dékadanan ta sirbi den e ministerio di tempu kompletu. Atraves di añanan, e vários sirkunstansianan ku e hòmber- i muhénan leal aki a haña nan aden a refiná nan fe. (1 Ped. 1:6, 7) Nan tabata dispuesto pa sakrifiká komodidat material pa por sirbi na lugánan ku tin nesesidat spesial. Awor algun di nan ta di edat avansá i ta konfrontá problema ku salú òf otro situashonnan difísil. (2 Kor. 4:16, 17) Apesar di esei, ‘den nan behes nan ta sigui duna fruta.’ (Sal. 92:14) Nan ta pone nan konfiansa den Yehova i e ta bendishoná nan.—Sal. 34:8; Pro. 10:22.
4 No tin duda, pioneronan spesial meresé nos elogio amoroso. Si bo tin e privilegio di tin pionero spesial den bo kongregashon, probechá di e oportunidat pa dediká tempu na nan i benefisiá di nan eksperensia. Mustra apresio pa nan sirbishi komo fiel proklamadó di Reino. Laga nan firmesa animá bo. Tur esnan ku imitá nan fe tambe por disfrutá di Yehova su aprobashon i bendishon pasobra “esnan ku ta trata ku fieldat ta su delisia.”—Pro. 12:22.