Kua Ta e Kuido Médiko di Mihó Kalidat?

“Básikamente, tur pashènt ku operá i haña tratamentu sin sanger, ta hañando e atenshon médiko di mihó kalidat.” Asina Dr. Michael Rose, direktor médiko i anestesiólogo, a bisa. Kua ta e proseduranan i alternativanan pa transfushon ku ta kai bou di “kuido médiko sin sanger”? Bo tin ku sa esei pa ora di tuma desishon relashoná ku tratamentu médiko i operashon bo por hasi esei a base di konosementu. Wak e vidio Sin Sanger—Medisina Ta Aseptá e Reto. Despues, evaluá bo konosementu ku e siguiente preguntanan.—Nota: Komo ku e vidio tin algun esena kòrtiku di operashon, mayornan mester tene kuidou ora nan ta wak e vidio huntu ku mucha chikí.

(1) Kua ta e motibu prinsipal pakiko Testigunan di Yehova ta nenga transfushon di sanger? (2) Ora ta trata di kuido médiko, kiko Testigunan di Yehova ta deseá? (3) Ki derecho básiko tur pashènt tin? (4) Pakiko ta lógiko i responsabel pa skohe alternativanan pa transfushon? (5) Ora un hende pèrdè hopi sanger, kua dos prioridat urgente dòkternan tin? (6) Kua ta e kuater prinsipionan di e strategianan alternativo pa transfushon? (7) Kon dòkternan por (a) minimisá pèrdida di sanger, (b) konserbá sèl kòrá di sanger, (c) stimulá produkshon di sanger i (d) rekuperá sanger ku a pèrdè? (8) Deskribí kiko ta (a) hemodilushon i (b) resiklahe òf rekuperashon di sèl. (9) Relashoná ku kualke alternativa pa transfushon, kiko lo bo kier ta informá di dje? (10) Por hasi operashonnan serio i kompliká sin rekurí na transfushon di sanger? (11) Ki desaroyo positivo ta tumando lugá den e komunidat médiko?

Kada persona tin ku disidí di akuerdo ku su konsenshi bíblikamente entrená si e ta aseptá òf rechasá sierto tratamentunan ku e vidio ta presentá. Bo a disidí kua alternativa pa transfushon bo ta dispuesto pa aseptá pa bo mes i pa bo yunan? Bo famianan ku no ta Testigu tambe mester ta bon informá di bo desishonnan i di e motibunan tras di esakinan.—Wak “Pregunta di Lektor” den E Toren di Vigilansia di 15 di yüni 2004, i den esun di 15 di òktober 2000.