“Kon Lo Bo Kontestá?”
1 Bo ta stima e Palabra di Dios pero ta haña ku ta difísil pa bo kòrda detayenan di relatonan bíbliko òf unda Beibel ta hasi sierto deklarashonnan spesífiko? Bo ke pa bo yunan tin un komprondementu eksakto di echo- i siñansanan básiko di Beibel? E rúbrika “Kon Lo Bo Kontestá?” publiká den kada edishon di ¡Despertad! na página 31 por yuda tantu hóben komo bieu haña mihó konosementu di e Palabra di Dios.—Echo. 17:11.
2 Kon ta e mihó manera pa bo usa e rúbrika aki? E ¡Despertad! di yanüari 2006 a duna e siguiente sugerensianan: “Tira un bista riba página 31 . . . Algun sekshon di e página lo atraé lektornan hóben; otronan lo ta un reto pa e memoria di studiantenan di Beibel mas avansá. E sekshon ‘Na Ki Tempu El A Sosodé?’ lo yuda bo traha un liña di tempu ku ta mustra na ki tempu personahenan bíbliko a biba i na ki tempu susesonan prinsipal a tuma lugá. E kontestanan pa e sekshon ‘Den e Edishon Aki,’ bo ta haña den henter e revista, miéntras ku kontesta pa mayoria di e otro preguntanan lo aparesé den e mesun edishon na un página designá, kaminda nan ta imprimí kabes abou. Pakiko no hasi sierto investigashon promé ku bo lesa e kontestanan ei, i despues kompartí loke bo a siña ku otronan? Podisé bo por asta usa e rúbrika nobo aki ‘Kon Lo Bo Kontestá?’ komo base pa estudio di famia òf pa konsiderashon bíbliko den grupo.”
3 Sí, hopi famia ta gusta usa e rúbrika aki komo base pa estudio di famia. Un mama a skirbi: “Ami ku mi kasá a pensa ku lo tabata un bon idea pa inkorporá e sekshon ‘Pa Mucha’ den nos estudio di famia pa hasié bibu i interesante pa nos yu muhé di tres aña. Ta un prèt pa bo mira kon ansiosamente e ta kohe su ¡Despertad! i blader den dje te ora e haña loke e ta buska.” Un tata na Brazil a bisa: “Ami ku mi yu hòmber di shete aña ta gusta e sekshon aki di ¡Despertad! masha hopi mes. El a yuda Moises presta atenshon, buska tekstonan di Beibel, kapta sentido di e plachinan i nifikashon di fecha.” Ashley di ocho aña a skirbi: “Danki pa e parti ‘Kon Lo Bo Kontestá?’ ku ta parti patras den e ¡Despertad! El a siña mi hopi kos di Beibel.”
4 Pakiko no usa e rúbrika “Kon Lo Bo Kontestá?” de bes en kuando komo parti di boso estudio di famia? Bo por usa e Indèks di Publikashonnan Watch Tower riba CD-ROM pa buska kontesta pa algun di e preguntanan ku ta mas difísil. Hasiendo asina, bo ta siña bo yunan kon pa hasi investigashon. Si bo tin yunan mas grandi, bo por duna nan e tarea mas difísil pa promé ku e estudio di famia nan buska e kontestanan pa “Ken Mi Ta?” òf “Na Ki Tempu El A Sosodé?” Anto nan por kompartí e resultado di nan investigashon durante e estudio. Uso efikas di e página aki ta un manera ku mayornan por inkulká e Palabra di Dios den nan yunan i yuda nan siña konosé “e skrituranan santu” for di infansia.—2 Tim. 3:15; Deu. 6:7.
[Study Questions]
1. Kiko hopi di nos ta haña ta difísil?
2. Kon bo por usa e vários sekshonnan di e rúbrika “Kiko Lo Bo Kontestá?”
3. Kon algun famia a benefisiá di e rúbrika aki, i kua sekshon abo ta gusta mas?
4. Kon un famia por usa e rúbrika aki komo parti di nan estudio di famia?