“Papia e Palabra di Dios sin Miedu”
1 Bo sa vasilá pa papia tokante bo fe ora un oportunidat presentá na skol òf na trabou? Bo tin problema pa duna testimonio informal na famia i bisiña òf kisas na hende ku bo no konosé? Kiko lo yuda nos tur probechá di okashonnan apropiá pa “papia e palabra di Dios sin miedu”?—Fil. 1:14.
2 No Vasilá: Lo bo vasilá pa defendé un bon amigu òf famia ku otronan a akusá falsamente? Atraves di siglonan, hende a duna un impreshon kompletamente robes di Yehova, nos mihó Amigu. Nos tin e privilegio úniko di duna testimonio na fabor di nos gran Dios! (Isa. 43:10-12) Amor profundo pa Yehova por yuda nos vense timides òf miedu i por motivá nos pa papia, i no vasilá pa duna testimonio di e bèrdat ku kurashi.—Echo. 4:26, 29, 31.
3 Kòrda ku nos mensahe ta un bon nobo. Lo e trese benefisio duradero pa hende ku hasi kaso di dje. Ora nos ta enfoká riba e importansia di e trabou di prediká i no riba nos mes òf nos oponentenan, esei lo yuda nos prediká ku kurashi.
4 Ehèmpel di Otronan: E ehèmpel di fiel sirbidonan di Dios ku a papia su palabra sin miedu ta duna nos fortalesa. Por ehèmpel, Enok a proklamá e huisio di Yehova kontra e pekadónan malbado. (Hudas 14, 15) Noe a prediká fielmente na hende ku tabata indiferente. (Mat. 24:37-39) E kristiannan di promé siglo kendenan no tabata “eduká ni siñá” a sigui prediká ounke nan a haña nan ku oposishon kruel. (Echo. 4:13, 18-20) Hopi bes E Toren di Vigilansia i e ¡Despertad! ta kontené historia di bida di rumannan den nos tempu ku a vense miedu di hende i a bira predikadónan seloso debí ku nan a ehersé fe den Yehova.
5 Ora nos pensa riba e bida di sirbidónan fiel di pasado ku a haña nan konfrontá ku situashonnan difísil, esei por duna nos kurashi. (1 Rei. 19:2, 3; Mar. 14:66-71) ‘Den nan Dios nan tabatin kurashi’ i a papia sin miedu. Nos tambe por!—1 Tes. 2:2.