Duna Hende Pober Speransa

¹ Hesus a mustra un interes spesial den hende pober. Tabatin okashonnan ku el a hasi milager pa duna yudansa material i kura hende malu. Pero el a konsentrá prinsipalmente riba e predikashon di e “evangelio” na hende pober. (Mat. 11:⁠5) Awe e ministerio kristian ta sigui benefisiá tantu hende pober komo otronan.​—⁠Mat. 24:⁠14; 28:​19, 20.

² Berdadero Speransa: Hopi bes lidernan religioso di kristiandat ta primintí hende pober ku nan lo bai dilanti si nan duna generosamente na iglesia. Sin embargo, Beibel ta siña ku ta e Reino di Dios so por kaba ku pobresa i resolvé tur e problemanan di humanidat. (Sal. 9:⁠18; 145:⁠16; Isa. 65:​21-⁠23) Ora nos mustra hende pober loke Beibel ta siña realmente, nos ta duna nan speransa i ta yuda nan satisfasé nan nesesidat spiritual.​—⁠Mat. 5:​3, NW.

³ E fariseonan den tempu di Hesus tabata menospresiá hende pober, i ku despresio nan tabata yama nan ‘am-ha·’á·rets, òf “hende di tera.” Sin embargo, pa Hesus “nan sanger,” òf nan bida, tabata algu “presioso.” (Sal. 72:​13, 14) Nos por imitá Hesus i ‘mustra miserikòrdia’ na hende pober dor di mustra interes personal den nan i sinti pa nan. (Pro. 14:⁠31) Nunka nos lo ke papia ku menospresio tokante hende ku ta biba den barionan pober ni vasilá pa prediká na nan. Hopi hende ku ta aseptá e mensahe di Reino ta hende di poko rekurso.

⁴ Yuda Nan Awor: Ademas, ora nos ta siña prinsipionan di Beibel na hende pober ku nos topa den teritorio, esaki ta yuda nan redusí e efektonan di pobresa for di awor. Por ehèmpel, Beibel ta kondená buracheria, gèmbelmentu, flohera, uso di tabako i otro práktikanan ku ta kontribuí na pobresa. (Pro. 6:​10, 11; 23:⁠21; 2 Kor. 7:⁠1; Efe. 5:⁠5) E Skritura ta animá hende pa ta onesto i pa traha ‘di kurason,’ òf di henter alma; i ta e kualidatnan ei un doño di trabou ta buska den su trahadónan. (Kol. 3:​22, 23; Heb. 13:⁠18) De echo, den un enkuesta mayoria di doño di trabou a pone onestidat i integridat komo e kualidatnan ku mas ta impreshoná nan ora nan ta konsiderá pa tuma un persona na trabou.

⁵ Yehova no ta indiferente pa ku e sufrimentu di hende pober. Pronto Hesukristu lo libra “esun den nesesidat ora ku e sklama pa yudansa.” (Sal. 72:⁠12) Te na e tempu ei, nos tin e privilegio di konsolá otro hende, inkluso esnan pober, ku e mensahe di speransa ku Beibel ta kontené.