Kaha di Pregunta

◼ Ta apropiá pa pone nos e-mail adrès personal riba literatura ku nos ta distribuí?

Algun publikadó a usa stèmpel òf un etikèt imprimí pa pone nan e-mail adrès personal riba revista òf tratado ku nan ta laga serka otro hende. E ora ei e persona ku aseptá e literatura por tuma kontakto ku e publikadó pa pidi mas informashon. Publikadónan ku ta hasi tal esfuerso pa yuda personanan interesá, ta hasié ku bon intenshon. Sin embargo, nos Website ofisial ta ser menshoná kaba parti patras di e revista- i tratadonan. P’esei anto, ta mihó pa nos no pone nos e-mail adrès riba e literatura.

Si un publikadó ke usa un pida papel apart pa duna hende den teritorio informashon di tal manera ku nan por tuma kontakto kuné, spesialmente ora e ta hasi rebishita, esei ta su desishon personal. Nos tin ku tuma inisiativa pa bai rebishitá personanan interesá en bes di djis laga pa nan tuma kontakto ku nos si nan ke haña mas informashon. Ta mas fásil pa mustra berdadero interes den un hende ora nos ta papia kuné personalmente.