Prediká sin Stòp
1 Tin biaha, nos ta sinti ku nos ta kubri nos teritorio kabalmente i ku frekuensia, pero ku masha poko bon resultado. Sin embargo, tin bon motibu pa nos sigui prediká.—Mat. 28:19, 20.
2 Komo un Testimonio: Hesus a predisí ku e trabou di prediká e Reino lo ta un parti importante di e señal kombiná di “e fin di tempu” i ku lo e ser hasí “komo un testimonio na tur nashon.” (Mat. 24:3, 14) E echo ku hende ta mira nos den e trabou di prediká e bon nobo di Reino ta un testimonio poderoso. Despues ku nos bai for di e teritorio, algun hende lo sigui papia tokante nos bishita pa oranan òf dianan largu, asta si nan no a skucha e mensahe. Loke lo yuda nos perseverá ta ora nos ta komprondé e motibu pakiko nos ta prediká. Nos ta agradá Yehova ora nos partisipá den kumplimentu di profesia bíbliko dunando testimonio i a la bes un mensahe di atvertensia.—2 Tes. 1:6-9.
3 Perseveransia Ta Nesesario: Pa motibu ku hende tin asina tantu distraishon i hopi otro kos ku ta eksigí tempu for di nan, perseveransia ta nesesario ora nos ta kultivá nan interes. Tur siman pa un aña largu Testigunan a bishitá un señora promé ku el a disidí di invitá nan pa drenta paden i kòmbersá tokante Beibel. E señora a gusta loke el a tende asina tantu ku el a aseptá un estudio di Beibel, a kuminsá asistí na reunion, i no a dura muchu ku el a ekspresá su deseo pa batisá.
4 Situashon di mundu ta kambiando rápidamente, i aktitut di hende tambe. Hopi hende ku anteriormente a rechasá nos bishita, awor kisas ta dispuesto pa skucha e mensahe di speransa ku nos ta kompartí. Si ún hende so reakshoná faborabel na e mensahe di Reino, anto e echo ku nos a perseverá a bale la pena.
5 Rònt mundu, mas i mas hende “ta suspirá i keha pa motibu di tur e abominashonnan ku ta wòrdu hasí.” (Eze. 9:4) E resultado di nos predikashon ta duna prueba ku hende ku ta stima hustisia ta reakshonando faborabel na e mensahe di Reino. (Isa. 2:2, 3) P’esei, laga nos sigui prediká sin stòp dor di perseverá ku amor den e trabou di hiba “bon nobo di felisidat.”—Isa. 52:7; Echo. 5:42.