Kon Nan Lo Tende?

1. Dikon no ta fásil pa prediká tur ora, i dikon nos ta sigui prediká tòg?

¹ Yehova su dia ta aserkando rápidamente. P’esei, ta urgente pa nos yuda mas tantu hende posibel pa haña konosementu eksakto di Dios i di su propósito pa humanidat. (Juan 17:⁠3; 2 Ped. 3:​9, 10) No ta tur ora esei ta fásil, ya ku hopi hende ta indiferente òf ta hasi bofon di nos pasobra nos ta prediká. (2 Ped. 3:​3, 4) Tòg, nos tin tur motibu pa kere ku te ainda tin hende den nos teritorio ku lo aseptá e bon nobo ora nan tend’é. Kon nan lo tende sin un predikadó?​—⁠Rom. 10:​14, 15.

2. Kon e ehèmpel di apòstel Pablo ta animá nos?

² Apesar di Oposishon: Ainda tin hende ku ta dispuesto pa tende e mensahe di Reino, p’esei nos no mester laga miedu dominá nos. E promé europeonan ku a tende apòstel Pablo prediká e bon nobo tabata hendenan di e stat di Filipos. Ora sierto hende a lanta akusashon falsu kontra Pablo ku Silas, nan a bati nan i a tira nan den prizòn. (Echo. 16:​16-⁠24) Pero, Pablo no a laga e eksperensia doloroso ei afekt’é. El a vense su miedu i a sigui prediká. Ora el a bishitá Tesalónika ku tabata e siguiente stat riba su ruta komo misionero, Dios a dun’é “kurashi.” (1 Tes. 2:⁠2) Pablo su ehèmpel ta animá nos pa nos sigui prediká.​—⁠Gal. 6:⁠9.

3. Kiko a pone algun hende ku no tabata interesá kambia di aktitut?

³ Hopi hende ku pa añanan largu a nenga di tende nos, awor a kambia di aktitut. Kisas kontratempu finansiero, malesa, morto di un famia òf un notisia alarmante ku ta asotá humanidat a pone nan kambia. (1 Kor. 7:⁠31) I algun ku tabatin mayornan ku ta kontra e bèrdat, awor a bira adulto i ke tende e mensahe. Ora nos sigui prediká, nos ta duna e personanan ei un oportunidat pa “invoká e nòmber” di Yehova promé ku ta lat.​—⁠Rom. 10:⁠13.

4. Kiko ta motivá nos pa sigui “sin stòp” den e ministerio?

⁴ “Sin Stòp”: Nos amor pa Dios i nos próhimo lo motivá nos pa sigui “sin stòp” den e trabou di prediká i hasi disipel, meskos ku e apòstelnan a hasi den promé siglo. (Echo. 5:⁠42, NW ) Hopi hende ta “suspirá i keha pa motibu di tur e abominashonnan” ku tin awendia. (Eze. 9:⁠4) Ki un speransa i alivio e personanan ei ta haña ora nan tende e bon nobo! I asta ora mayoria di hende nenga di skucha, Beibel ta sigurá nos ku Yehova ta keda kontentu ku e esfuerso ku nos a hasi.​—⁠Heb. 13:⁠15, 16.