‘E Nòmber di Dios Sea Santifiká’

1. Kiko ta e tema di e asamblea di sirkuito pa e aña di sirbishi 2012, i riba kiko e ta basá?

¹ Ki un gran onor nos tin di por karga e nòmber di e Soberano di Universo, Yehova! Ta Dios mes a duna nos e privilegio ei. Spesialmente desde 1931, nos a adoptá e nòmber Testigunan di Yehova i di e manera ei ta identifiká nos mes ku e nòmber úniko di Dios. (Isa. 43:⁠10, NW ) Hesus, e Yu unigénito di Dios, a halsa Yehova su nòmber. P’esei, el a mustra den su orashon modelo ku e nòmber ei mester bini na promé lugá. (Mat. 6:⁠9) E promé palabranan ei ku Hesus a menshoná den e orashon modelo ei, ta e base pa e tema di nos programa di asamblea di sirkuito pa e aña di sirbishi 2012. E tema ta: “E Nòmber di Dios Sea Santifiká.”

2. Kua ta algun tema ku lo ser tratá den e asamblea di sirkuito?

² Loke Nos Lo Bai Tende: Riba djasabra e diskurso ku e tema “Hasi Dios Su Nòmber Konosí Komo Sirbidónan di Tempu Kompletu” lo mustra nos dikon sirbishi di tempu kompletu ta un estilo di bida ku ta duna nos satisfakshon. Nos lo haña un simposio tambe ku e tema: “Tene Kuidou pa No Trese Reproche Riba Yehova Su Nòmber.” E simposio akí lo yuda nos evitá kuater trampa ku por forma un peliger pa nos. Ademas, e diskurso “Pakiko e Nòmber di Dios Mester Ta Santifiká” lo kontestá e siguiente preguntanan: Kiko lo yuda nos prediká ku zelo aunke ta parse ku hende no ta interesá? Kiko lo yuda nos pa ta efikas den nos ministerio? Riba djadumingu, nos lo haña un simposio ku ta konsistí di kuater parti ku lo mustra kon nos por santifiká Dios su nòmber mediante nos pensamentunan, abla, desishonnan i kondukta. Anto spesialmente esnan ku ta nobo den e bèrdat, lo disfrutá di e diskurso públiko, titulá: “Yehova Lo Santifiká Su Gran Nòmber na Armagedón.”

3. Ki privilegio nos tin, i kon e programa di asamblea lo yuda nos?

³ Pronto Yehova lo aktua pa santifiká su nòmber. (Eze. 36:⁠23) Miéntras tantu, nos tin e privilegio di defendé tur loke Yehova su nòmber santu ta representá. Nos tin sigur ku e programa di asamblea di sirkuito akí lo yuda kada un di nos kumpli ku nos responsabilidat serio di karga e nòmber di Dios.