Simia Mester Haña Awa pa Por Krese
1. Kiko mester haña awa pa por krese?
1 Simia plantá mester haña awa pa por krese. Meskos ta konta pa simia di e bèrdat ku nos ta planta den kurason di hende den nos teritorio. (1 Kor. 3:6) P’esei nos mester rebishitá nan i asina muha e simianan figurativo akí mediante e Palabra di Dios. Komo resultado di esei, nan lo por kria rais, krese i duna fruta.
2. Kon nos por pone e base p’e próksimo bishita?
2 Hasi un Pregunta: Ora bo ta prepará bo presentashon, pensa riba un pregunta ku por lanta interes di e persona i ku lo bo por hasi na final di e kòmbersashon. Anto bisa e persona ku lo bo ke kontestá esaki na e próksimo bishita i traha un afsprak pa bolbe. Hopi publikadó a haña ku ta práktiko pa skohe un pregunta for di e buki Beibel Ta Siña pa nan por demostrá kon un estudio di Beibel ta bai.
3. Ki informashon bo por skirbi despues di e promé bishita?
3 Skirbi Tur Kos: Manera bo despedí di e doño di kas, tuma tempu pa nota e siguiente puntonan: Nòmber i adrès di e persona, fecha i ora ku bo a papia kuné, tópiko di boso kòmbersashon i kua literatura bo a laga, si esei tabata e kaso. El a bisa ku e ta pertenesé na un sierto religion? El a papia di su famia? El a menshoná su interes- i preokupashonnan? E tipo di informashon ei ta importante, pasobra a base di esei bo por prepará tópiko pa e siguiente bishitanan. Kòrda skirbi tambe e dia ku bo a palabrá di bolbe i e pregunta ku bo a laga atras pa kontestá.
4. Pakiko nos tin ku perseverá den hasi rebishita?
4 Perseverá: Satanas lo no kansa di purba “kita e palabra” ku tin plantá den un hende su kurason. (Mar. 4:14, 15) P’esei, no entregá ora bo bai bèk pa hasi e rebishita i bo no haña e persona na kas. Ke tal bo manda un karta pa e persona òf djis laga un nota pa e sa ku bo a pasa? Un pionero a kuminsá un estudio di Beibel ku un persona na porta, pero despues e no a logra haña e señora na kas. P’esei, el a skirbié un karta. Finalmente, ora e ruman muhé a logra haña e señora na kas, e señora a bisa ku el a keda masha konmoví p’e echo ku e ruman a mustra interes den dje. Segun ku nos ta muha simia di e bèrdat, nos por eksperensiá e goso di mira e simianan akí krese i “duna fruta 30 biaha mas tantu, 60 biaha mas tantu i 100 biaha mas tantu.”—Mar. 4:20.