Kon pa Mehorá Nos Sirbishi: Prepará e Tereno pa Hasi Rebishita

Dikon E Ta Importante: Ora nos haña un persona ku mustra interes, nos ke bolbe bishit’é ora e ta na kas pa asina nos muha e simia di bèrdat ku nos a planta. (1 Kor. 3:6) Pa nos por hasi esaki, promé ku nos bai, nos tin ku saka afó ki dia nos por bolbe, i asina prepará e tereno pa hasi e rebishita. Ademas, ta bon pa laga un pregunta ku nos lo trata na nos siguiente bishita. Esaki lo laga e persona keda pendiente pa e bishita, i si nos indiká ku den e publikashon ku nos a ofres’é e por haña kontesta pa e pregunta, e chèns ta grandi ku lo e les’é. Tambe, si nos prepará e tereno for di adelantá, ta bira mas fásil pa hasi e rebishita, ya ku nos a palabrá kaba ki tópiko nos ta bai trata i e persona sa tokante kiko nos lo papia. Na nos siguiente bishita, nos por splik’é ku nos a bini pa kontestá e pregunta ku nos a hasi último biaha anto sigui ku e kòmbersashon.

Kon pa Hasié:

Ora bo ta prepará e presentashon ku bo ta bai usa di kas pa kas, prepará tambe un pregunta ku lo bo kontestá na e siguiente bishita. E pregunta por ta basá riba un tópiko ku ta ser tratá den e literatura ku bo ta bai ofresé e dia ei, òf e por ta un pregunta ku ta ser kontestá den un di nos publikashonnan di estudio ku lo bo por ofresé na e siguiente bishita.
Ora bo kaba di kòmbersá ku un persona ku mustra interes, bis’é ku lo bo tin gana di kòmbersá kuné atrobe, anto hasié e pregunta ku bo a prepará. Hende den algun teritorio ta hopi okupá i no ta mashá dispuesto pa komprometé nan mes pa un siguiente bishita. Den un kaso asina, bo por bisa: “Ta den e oranan akí bo sa ta na kas? [Permití e persona kontestá.] Lo mi ke bolbe otro siman un ratu asina pa kontestá e pregunta akí . . . Si bo ta hopi okupá ora mi bini, djis laga mi sa.”
Si bo bisa e persona ku lo bo bolbe un dia i ora spesífiko, kumpli ku bo palabra. (Mat. 5:37) Na final di e rebishita, prepará e tereno pa e siguiente bishita.

Purba di Hasi Esaki Durante e Luna Akí:

Ora bo ta prepará bo presentashon, prepará tambe un pregunta ku lo bo kontestá na e siguiente bishita. Kompartí loke bo a prepará ku otro publikadó ora boso ta traha huntu.