Bai Bèk Serka Personanan Interesá​—⁠Despues di Kuantu Tempu?

1. Kiko e trabou di hasi disipel ta enserá?

¹ E trabou di hasi disipel ta enserá bai bèk serka tur persona ku mustra ku nan tin gana di siña tokante Yehova su Reino. (Mat. 28:​19, 20) Despues di kuantu tempu nos mester hasi un rebishita? Hopi bes, esei ta dependé di nos programa i esun di e persona interesá. Dikon nos mester bolbe pronto despues di e promé bishita?

2, 3. Dikon nos mester hasi esfuerso pa bolbe mas pronto posibel?

² Dikon Nos No Mester Tarda? E trabou di prediká e ‘evangelio di reino’ ta hopi avansá kaba, i e fin di e sistema di kosnan akí ta serka. (Mat. 24:⁠14; 1 Ped. 4:⁠7) P’esei, miéntras ainda tin chèns pa personanan interesá probechá di “e dia di salbashon” akí, nos tin ku kumpli ku e instrukshon pa “prediká e palabra” urgentemente. I esei ta enserá bolbe mas pronto posibel pa kultivá e interes di e persona ku nos a papia kuné.​—⁠2 Kor. 6:​1, 2; 2 Tim. 4:⁠2.

³ Satanas ta ansioso pa eliminá kualke simia di Reino ku nos lo por planta den kurason di e persona ku mustra interes. (Mar. 4:​14, 15) Hopi bes, e persona akí ta hañ’é konfrontá ku mofa di miembronan di famia, kompañeronan di trabou i otro hende. Si nos bolbe mas pronto posibel, nos por sigui ku e kòmbersashon anterior i kultivá e chispa di interes ku e persona a demostrá, promé ku otro hende pag’é.

4. Kon nos por pone base pa un rebishita for di ora nos hasi e promé bishita?

⁴ Traha Afsprak: Ta mihó pa traha afsprak definitivo pa bolbe serka e persona promé ku bo terminá e promé bishita. Ademas, hasi un pregunta ku lo bo kontestá durante e siguiente bishita. Anto ta bon pa bo anotá loke boso kòmbersá, e pregunta ku bo hasi i e afsprak. Si bo programa ta permití, bo por puntra e persona si bo por bini e siguiente dia òf djis despues di esei. Si bo promé bishita ta durante fin di siman, i e persona interesá ta traha den siman, kisas lo e bai di akuerdo pa bo bishit’é e siguiente fin di siman. Ora bo traha un afsprak, sòru di kumpli ku bo palabra.​—⁠Mat. 5:⁠37.

5. Dikon ora nos bolbe sin tarda esaki ta yuda nos kumpli ku e asignashon di hasi disipel ku Hesus a duna nos?

⁵ Nos tin bon motibu pa bolbe mas pronto posibel serka hende ku mustra interes. P’esei, traha afsprak ku nan i no tarda pa bolbe, pasobra ‘e tempu ku a sobra ta kòrtiku.’ (1 Kor. 7:⁠29) Mas lihé nos rebishitá e personanan ku mustra interes den e mensahe di Reino, mas chèns nos tin di haña bon resultado.