Probechá di e Oportunidatnan Ku Bo Tin pa Plama e Mensahe di Reino!

1. Ki lès nos por siña for di e aktitut di David?

¹ Rei David no a laga su sirkunstansianan den bida bira un opstákulo p’e. Por ehèmpel, e kier a traha un kas di adorashon pa Yehova pero Dios no permitié hasi esei. Pues, David a ahustá su meta i a prepará tur kos pa su yu Sálomon traha e tèmpel. (1 Rei. 8:17-19; 1 Kró. 29:3-9) Na lugá di sinta lamentá riba loke e no por a hasi, David a enfoká riba loke sí e por a hasi. Kon nos por tin e mesun aktitut ei ora di plama e mensahe di Reino?

2. Kiko kada un di nos por analisá pa nos mes?

² Hasi Loke Bo Por: Hopi ruman a simplifiká nan bida pa nan por traha sea pionero ousiliar òf regular. (Mat. 6:22) Abo por djòin nan? Ora bo pidi Yehova yuda bo analisá bo sirkunstansianan, kisas lo bo mira ku tin “un porta grandi ku ta hiba na aktividat” habrí bo dilanti. Si ta asina, probechá di e oportunidat ei!—1 Kor. 16:8, 9.

3. Aunke nos sirkunstansianan no ta permití nos traha pionero, kua oportunidatnan nos por probechá di dje pa duna testimonio?

³ Pero, kiko si bo sirkunstansianan no ta permití bo traha pionero? Pensa riba e otro opshonnan ku tin. Por ehèmpel, si na bo trabou bo tin kontakto ku hende ku no ta Testigu, dikon no probechá di e oportunidatnan ku presentá pa duna nan testimonio? Òf si bo tin problema ku salú, dikon no papia tokante e Reino ku e personal médiko i esnan ku ta duna kuido? Kòrda ku publikadónan ku no por hasi muchu debí na edat avansá òf problema serio ku salú por raportá nan ora di sirbishi di vèlt den frakshonnan di 15 minüt. Ora ku bo ta yena bo rapòrt fin di luna, hasi sigur di konta tur e minütnan ku bo a duna testimonio informal i tambe tur literatura ku bo a laga, asta tratado i invitashon di Memorial òf kongreso. Lo bo keda sorprendí di mira e total di tur e esfuersonan chikí ei!

4. Kiko nos ta determiná pa hasi?

⁴ Sea kual sea nos sirkunstansianan, laga nos probechá di kada oportunidat ku presentá pa plama e bon notisia. Esei lo laga nos sinti e satisfakshon di sa ku nos ta hasi tur loke nos por pa e Reino.—Mar. 14:8; Luk. 21:2-4.