Krea Oportunidat pa Prediká
1 E kongregashon kristian ta konsistí di hende ku ta den diferente sirkunstansianan. Sin embargo, nos tur tin e mesun determinashon pa alabá Yehova. (Sal. 79:13) Kon nos por krea oportunidat pa prediká, si malesa òf otro sirkunstansianan difísil ta stroba nos di proklamá e bon nobo?
2 Durante Nos Aktividatnan Diario: Hesus a probechá di e kontakto diario ku e tabatin ku hende pa duna testimonio. El a papia ku Mateo ora el a pasa banda di un ofisina di belasting, ku Zakeo el a papia durante un biahe i ku un muhé samaritano ora e tabata sosegá. (Mat. 9:9; Luk. 19:1-5; Juan 4:6-10) Durante nos aktividatnan diario, nos tambe por probechá di kualke kòmbersashon pa duna testimonio. Si nos tin un Beibel, huntu ku tratado òf foyeto na man, esei lo stimulá nos pa ta dispuesto tur ora pa papia di nos speransa.—1 Ped. 3:15.
3 Desabilidat físiko ta limitá bo partisipashon den e trabou di kas pa kas? Sea alerta pa oportunidatnan pa prediká na personal médiko ku ta bin serka bo i tambe na otro hende ku bo tin kontakto kuné. (Echo. 28:30, 31) Si bo sirkunstansianan ta pone ku hopi bes bo tin ku keda kas, bo a yega di purba duna testimonio via telefòn òf karta? Un ruman muhé ta skirbi su famianan ku no ta Testigu regularmente. Den e karta e ta pone pensamentunan animante for di Beibel i tambe eksperensianan ku e tabatin ora e tabata prediká.
4 Na Skol òf na Trabou: Nos deseo pa alabá Yehova lo motivá nos pa krea oportunidat pa planta simia di e bèrdat tambe na skol òf na trabou. Un publikadó di ocho aña a konta su klas loke el a lesa tokante luna den Spièrta! Ora su maestro a haña sa di unda e publikadó a saka e informashon, el a kuminsá aseptá E Toren di Vigilansia i Spièrta! regularmente. Na trabou nos por djis laga e buki Beibel Ta Siña na un sitio ku otronan por mir’é, i esaki podisé ta pone nan hasi pregunta ku ta hiba na un testimonio.
5 Bo por pensa riba maneranan pa krea oportunidat pa prediká durante bo aktividatnan diario? Laga nos hasi esfuerso tur dia pa ofresé “sakrifisio di alabansa na Dios” dor di probechá di nos sirkunstansianan.—Heb. 13:15.