NOS BIDA KRISTIAN
Kon pa Bira un Bon Studiante di Beibel
Lo bo ke ta fiel manera Daniel ora bo haña bo ku prueba? Daniel tabata un bon studiante di e Palabra di Dios. El a studia asta profesianan profundo. (Dan 9:2) P’esei, si bo studia Beibel regularmente, esei por yuda bo keda fiel. Kon asina? Estudio diligente por yuda bo fortalesé bo fe ku Yehova lo kumpli ku su promesanan. (Hos 23:14) Ademas, esei por yuda bo oumentá bo amor pa Dios, ku na su turno lo motivá bo pa hasi loke ta korekto. (Sl 97:10) Pero, unda bo por kuminsá? At’akí algun sugerensia.
Kiko mi por studia? Un bon rutina di estudio ta inkluí prepará pa e reunionnan. E lesamentu di Beibel semanal lo benefisiá bo mas si bo buska informashon tokante e tekstonan ku bo no a komprondé. Algun ruman ta skohe tambe pa siña mas tokante e profesianan di Beibel, e aspektonan di e fruta di spiritu santu, e biahenan ku apòstel Pablo a hasi komo misionero òf asta tokante Yehova su kreashon. Si un pregunta di Beibel bini na bo mente durante dia, hasi anotashon di dje i buska e kontesta durante bo siguiente estudio personal.
Unda mi por haña informashon? Pa bo haña algun idea, wak e vidio Hèrmènt pa Buska Tesoro Spiritual. Pa tèst bo konosementu, buska informashon ku ta yuda bo identifiká kiko e bestianan di e profesia di Daniel kapítulo 7 ta representá.
Kuantu tempu mi tin ku dediká na studia? Pa bo por tin bon salú den sentido spiritual, bo tin ku studia regularmente. Si ta nesesario, bo por kuminsá ku un seshon kòrtiku di estudio i pokopoko oumentá e tempu ku bo ta studia. Estudio di e Palabra di Dios ta manera buska tesoronan skondí; mas tesoro bo haña, mas bo ke sigui buska! (Pro 2:3-6) Bo deseo pa siña mas di Beibel lo oumentá, i un estudio regular di Beibel lo ta parti di bo rutina.—1Pe 2:2.
KIKO E BESTIANAN DI E PROFESIA DI DANIEL KAPÍTULO 7 TA REPRESENTÁ?
PREGUNTA ADISHONAL:
Kon Daniel 7:8 i 24 a kumpli?
SIGUIENTE PROYEKTO:
Kiko e bestianan di Revelashon kapítulo 13 ta representá?